Pas protestave të fuqishme antiqeveritare që çuan në dorëheqjen e presidentit kirgiz, Bilushi i Metës bëri publike letrën që Ilir Meta i ka dërguar opozitës kirkize:
“Të dashur vëllezër opozitarë!
Po ndjek me mendje dhe zemër protestat tuaja të fuqishme në Kirgizstan.
Unë jam një dashnor i vjetër i zgjedhjeve të lira.
Zgjedhjet e lira e të ndershme që kam bërë më 2001, janë shembull për demokracinë shqiptare.
Kundërshtarët e mi çuan 40 mandate në gjykatë, por dhe aty ua fitova të gjitha.
Prej atëhere nuk ka më zgjedhje të lira në Shqipëri, pasi mua më hoqën nga kryeministër, ndërkohë që të gjtihë duan të më kopjojnë mua.
Në vitin 2019, ua anulova zgjedhjet lokale dhe i shtyva 4 muaj, por populli ynë nuk është si populli kirgiz.
As e përfilli fare dekretin tim dhe shkuan në zgjedhjet e manipuluara.
Biles dhe opozita nuk ma përfilli datën e re të zgjedhjeve.
E gjithë kjo erdhi nga disa udhëzime që kishte lënë para se të ikte në Kirgistan ambasadori Donald Lu, i cili është armik i demokracisë, i zgjedhjeve të lira dhe imi personalisht.
Ndaj tani që po e fitoni betejën, kujdes nga ai njeri.
Ai do t’iu marrë me të mirë muajin e parë, do t’u vijë në zyrë dhe do fillojë t’u mbushë mendjen që tani duhet të vendoset drejtësia.
Pastaj do t’u premtojë reformën në drejtësi.
Aty do thotë që drejtësia duhet të jetë e pavarur dhe duhet të dënojë të korruptuarit e pandëshkuar për 30 vjet.
Mos e hani atë lojë.
Ne po shkatërrohemi si vend vetëm se ramë në kurthin e tij.
Qyshkurse pranuam skenarin e tij të reformës në drejtësi, e lamë vendin pa gjykata dhe pa drejtësi.
Biles drejtësia po shkon në dorë të pushtetit, që duan ta përdorin kundër nesh.
Ndaj duhet ta ruani fitoren, si sytë e ballit.
Mos lejoni në zyrë Donald Lu.
Mos lejoni propozime për reformë në drejtësi.
Ruani fitoren tuaj dhe mos e dorëzoni më pushtetin.”