Analisti Frrok Çupi ka shpërthyer mbrëmjen e djeshme ndaj regjisorit Robert Budina dhe kauzës së tij për të mbrojtur Teatrin Kombëtar.
Çupi u shpreh se kjo kauzë tashmë ka vdekur, ndërsa ata që pretendonin ta mbronin, tanimë që u shemb bërtasin si revolucionarë ordinerë.
“Artistët nuk kanë kauza politike dhe këtu kanë falimentuar ata. Teatri është i qytetarëve dhe aty ka vdekur kauza, kurse këta bëjnë si revolucionarë ordinerë që dalin bërtasin, se teatri është fshirë nga faqja e dheut. Artisti është mazhorancë në teatër, piktori në ekspozitë. Artistët e Teatrit janë pakicë. Edhe kërkesa për teatër të ri është një minorancë. Këta kanë përfitimet e veta. Se shkuan në Paris me ca para.
Këta kanë ndërmarrë një kauzë revolucionare tashmë. Artistët në vendin tonë janë futur në Kuvend, por askush prej tyre nuk ka ngelur. Ju nuk u bëtë dot si artistë, doni të bëheni politikanë. Kurse këta që janë ofruar me PS-në janë më minorë, se nuk po bëhen deputetë”, tha Çupi në emisionin “PolitikON”.
Nga ana tjetër ishte Robert Budina, i cili nga Teatri u katapultua në radhët e PD dhe përveç disa funksioneve që mban në këtë parti, së fundmi është dhe të lista për deputetë në Tiranë. Budina është shprehur se synon të bëhet deputetë për të treguar si bëhet politika në vend.
“Ne u nisëm të mbronim një monument kulturor kombëtar dhe nëse do të nisnim një parti politike, do të përdorim kulturën për mjete politike. Në imazhin e njerëzve, politika është e kriminalizuar. Ne nuk e parashikuam se do të mbërrinin këtu, ku ndenjëm mbi 2 vite në Teatër.
Ne kemi pasur edhe bashkëpunimin e forcave opozitare, por ama ata nuk na janë imponuar me idetë e tyre, pasi kanë ardhur si mbështetës të kulturës. Për mënyrën se si kemi bashkëpunuar ne kemi vepruar në të tillë mënyrë.
Ne kemi një sfidë; që teatri të kthehet ashtu sikurse ishte dhe ku ishte. Unë s’kam pse e fsheh se jam i djathtë. Ne duhet të tregojmë se kemi ardhur dhe ku duam të shkojmë, duke u bëre një shembull për gjithë shoqërinë tonë. Deri më sot kanë qenë në Kuvend shumë artistë, por s’kanë folur. Sfida ime nuk është të bëhem deputet, por të rikthej kulturën e të bërit politikë dhe se si sillemi me vendit.”, u shpreh Budina.