Një pjesë e mirë e institucioneve të pavarura nuk i zbatojnë rekomandimet e Parlamentit. 24 institucione raportojnë çdo vit punën e kryer dhe Kuvendi del me një rezolutë përkatëse.
Sot në seancë plenare Kuvendi do të miratojë një raport me punën e çdo institucioni ku bie në sy neglizhenca e shumë prej tyre. Sipas të dhënave të raportit, institucioni më problematik dhe që nuk ka plotësuar asnjë nga rekomandimet gjatë viti 2020 është Enti Rregullator i Ujit.
Raporti tregon se ky institucion nuk ka arritur të plotësojë asnjë nga rekomandimet më të rëndësishme dhe të theksuara vazhdimisht, atë për licencimin e shoqërive ujësjellëse. Kështu nga 10 detyra të lëna nga Kuvendi për ERRU, ky i fundit nuk ka përfunduar asnjërën prej tyre.
“Enti Rregullator i Ujit, ERRU nga 10 rekomandime të adresuara nga Kuvendi i Shqipërisë në rezolutën e miratuar në datën 21.05.2020, “Për vlerësimin e veprimtarisë së Entit Rregullator të Ujit për vitin 2019. sipas informacionit zyrtar të ardhur nga ERRU, rezulton se deri në muajin dhjetor 2020 janë në proces realizimi, ndërsa 2 rekomandime janë të parealizuara”, thuhet në raport.
Neglizhencë e lartë është evidentuar edhe në punën e Këshillit të Lartë Gjyqësor, i cili, sipas raportit, ka lënë pa realizuar 7 rekomandime nga 10 në total. Sipas raportit, ky institucion ka pasur një sërë parregullsish në çështjet lidhur me vakancat dhe plotësimin e tyre për të kryer siç duhet detyrat.
“Këshilli i Lartë Gjyqësor Nga 10 rekomandime të adresuara nga Kuvendi i Shqipërisë në rezolutën e miratuar në datën 25.06.2020. “Për vlerësimin e veprimtarisë se Këshillit të Lartë Gjyqësor për vitin 2019”, sipas informacionit zyrtar të ardhur nga KLGJ rezulton se deri në muajin dhjetor 2020 janë realizuar plotësisht 3 rekomandime, ndërsa 7 rekomandime janë në proces realizimi”, theksohet në raport.
AMF dhe Avokati i Popullit neglizhojnë detyrat
Autoritetit i Mbikëqyrjes Financiare dhe Avokati i Popullit janë dy institucione të tjerë të cilët janë treguar neglizhentë ndaj rekomandimeve të Parlamentit. Në raportin e publikuar tregohet se AMF nga 12 rekomandime të lëna ka plotësuar vetëm 2, pra 10 rekomandime nuk janë përfunduar.
“Autoriteti i Mbikëqyrjes Financiare, AMF Nga 12 rekomandime të adresuara nga Kuvendi i Shqipërisë në rezolutën e miratuar ne datën 23.07.2020 “Për vlerësimin e veprimtarisë së Autoritetit të Mbikëqyrjes Financiare për vitin 2019”, sipas informacionit zyrtar të ardhur nga AMF, rezulton se deri në muajin shtator 2020 janë realizuar plotësisht 2 rekomandime, ndërsa 10 rekomandime janë në proces realizimi”, tregon raporti.
Në listën e institucioneve të papërgjegjshëm është renditur edhe Avokati i Popullit. Kuvendi tregon se ky institucion i pavarur ka realizuar vetëm 4 nga 12 rekomandimet të lëna si detyrë. Sipas raportit, një nga rekomandimet që nuk është plotësuar, por që në fakt është shumë i nevojshëm është ai që të rrisë angazhimin në mbrojtje të interesave të shtetasve shqiptarë, që banojnë jashtë vendit, duke rritur bashkëpunimin me institucionet homologe. Tjetër rekomandim i parealizuar është ai që të raportojë në mënyrë periodike në Kuvendin e Shqipërisë për raportimin e kërkesave ankesave të adresuara në nivel vendor.
“Avokati i Popullit, AP Nga 12 rekomandime të adresuara nga Kuvendi i Shqipërisë në rezolutën e miratuar në datën 09.07.2020. “Për vlerësimin e veprimtarisë së Avokatit të Popullit vitin 2019”, sipas informacionit zyrtar të ardhur nga AP, rezulton se deri në muajin dhjetor 2020 janë realizuar plotësisht 4 rekomandime, janë në proces realizimi 6 rekomandime, ndërsa 2 rekomandime nuk janë realizuar”, theksohet në raport.