Qeveria i rekomandon Prokurorisë së Përgjithshme dhe Prokurorisë së Posaçme që të përqëndrojnë punën te identifikimi dhe ndjekja penale jo vetëm e ish-gjyqtarëve dhe ish-prokurorëve të shkarkuar nga vettingu për mosjustifikim pasurie, apo lidhjet e dyshimta me elementë kriminalë, por edhe të atyre që u dorëhoqën para se t’i nënshtroheshin procesit të rivlerësimit.
Ministrja e Drejtësisë, Etilda Gjonaj shpalosi rekomandimet në një takim virtual me përfaqësues të Prokurorisë së Përgjithshme dhe asaj të Posaçme, ku tha se ndjekja penale e kësaj kategorie të ish-punonjësve të sistemit të drejtësisë nuk është vetëm kërkesë e Qeverisë shqiptare, por edhe e partnerëve ndërkombëtarë.
“Qytetarët presin që çdo gjyqtar, apo prokuror që është pasuruar në kurriz të halleve të popullit shqiptar, të vetmin fat që duhet të ketë është dalja përballë drejtësisë dhe sekuestrimi i pasurisë. Kjo ka qenë në vijimësi kërkesë e ndërkombëtarëve, që duhet t’i vendoset në vëmendje SPAK dhe GJKKO”, deklaroi ministrja e Drejtësisë, Etilda Gjonaj.
Mes rekomandimeve, Qeveria vëren se në sistemin e drejtësisë po keqpërdoret pavarësia e dhënë me ligj për prokurorët dhe gjyqtarët për të shmangur llogaridhënien.
“Ka qasje në kundërshtim me frymën mbi të cilën u ndërmor reforma në drejtësi; ajo e keqkuptimit të pavarësisë për të shmangur llogaridhënien”, deklaroi ministrja.
Drejtuesve të prokurorive u kërkoi që me përgjegjshmëri të garantojnë pavarësinë dhe llogaridhënien dhe të forcojnë bashkëpunimin mes vetë prokurorive, por edhe me institucionet e tjera.
Mungesa e bashkëpunimit është ngritur si shqetësim edhe në raportin vjetor të Prokurorisë së Përgjithshme, të prezantuar së fundmi para Këshillit të Lartë të Prokurorisë dhe Kuvendit nga kryeprokurori Olsian Çela.
Ky i fundit vlerësoi rekomandimet e Qeverisë dhe kërkoi nga vartësit e tij që të angazhohen maksimalisht për zbatimin e tyre.
Është e domosdoshme një përfshirje më e madhe e drejtuesve në ndjekjen e rekomandimeve përmes udhëzimeve të përgjithshme dhe atyre për çështje konkrete. U tërheq vëmendjen drejtuesve të prokurorive për t’i vlerësuar maksimalisht rekomandimet dhe në vijim të hartojnë plane të qarta veprimi për ndjekjen e tyre”, deklaroi Çela.