Në mënyrë misterioze është shpallur vakant vendi në drejtorinë e Qendrës Kombëtare të Kulturës për Fëmijë dhe Teatrit të Kukullave.
Deri tani këtë pozicion e mbante aktorja Monika Lubonja e cila akuzohet për keqmenaxhim fondesh dhe shpërdorim të detyrës.
Sipas ministrisë, aplikimi dhe dorëzimi i dokumenteve bëhet brenda datës 13/04/2018, pranë Zyrës së Protokollit, në Ministrinë e Kulturës.
“Në zbatim të Vendimit të Këshillit të Ministrave nr. 173, datë 07.03.2003 “Për emërimin, lirimin ose shkarkimin nga detyra të drejtuesve të institucioneve, në varësi të Këshillit të Ministrave, Kryeministrit ose Ministrit”, si dhe të Ligjit 10352, datë 18.11.2010 “Për artin dhe kulturën”, i ndryshuar, Ministria e Kulturës shpall konkursin për pozicionin: Drejtor në Qendrën Kombëtare të Kulturës për Fëmijë. Aplikimi dhe dorëzimi i dokumentave të bëhet brenda datës 13/04/2018, pranë Zyrës së Protokollit, në Ministrinë e Kulturës” – thuhet në njoftimin e Ministrisë së Kulturës.
Kujtojmë se Prokuroria po heton për keqmenaxhimin, abuzimin me fondet dhe shpërdorimin e detyrës nga Monika Lubonja.
Hetimi i prokurorisë dhe ai i Ministrisë se Kulturës nisen pasi në media u publikuan raste të shitjes së repertorit të shfaqjes së Teatrit te Kukullave për aktivitete private dhe një tender për kupat e 70 vjetorit të Qendrës Kulturore Kombëtare te Fëmijëve, të drejtuar nga Monika Lubonja.
Tenderi i këtyre kupave, u zhvillua 1 javë pas aktivitetit, ku mori pjesë edhe Ministrja e Kulturës, Mirela Kumbaro.