Partia Socialiste mblodhi sot Asamblenë Kombëtare, një takim i zhvilluar në Durrës, i cili nisi me fjalën e Sekretarit të Përgjithshëm, Blendi Klosi, duke bërë një pasqyrim të plotë të punës organizative të strukturave socialiste në terren, por edhe një bilanc të rezultatit të zgjedhjeve të fundit, ku PS fitoi mandatin e katërt qeverisës.
Duke u ndalur në secilin qark, Klosi tha se rezultatet e arritura e rendisin Fierin si qarkun ku PS arriti fitoren më të fortë. Drejtuesja politike e socialistëve, Belinda Balluku arriti të merrte 12 mandate, duke vendosur një rekord me mbi 60% të votave.
E ndërsa fitorja u arrit edhe në qarqet e tjera, Klosi shfaqi rezerva sa i takon qarkut të Tiranës, duke nëvizuar se në këtë zonë nuk është arritur maksimumi. Veçanërisht humbja në bashkinë e Kavajës, cilësohet nga socialistët si një dështim. Drejtimi i fushatës në këtë bashki i ishte besuar Elisa Spiropalit, ish-ministre e Jashtme, e cila duket se pas largimit nga kabineti qeveritar ka marrë një tjetër “vërejtje” nga PS, këtë herë për performancën në zgjedhje.
“Fieri del qarku më i fortë, por shumica e qarqeve janë mesazh stabiliteti për PS. PS nuk është vetëm forcë e parë, por është forca që organizon terrenin. Tirana është rezervuari më i madh i votës sonë, kjo e bën Tiranën edhe sfidën më të madhe”, tha Klosi, teksa shtoi më tej duke ju referuar Tiranës se “nuk kemi arritur akoma maksimumin tonë, këtu flas për të gjithë qarkun”.