Një sulm me zjarrvënie ndaj katër ambulancave të shërbimit vullnetar hebraik Hatzola në veri të Londrës po hetohet si një krim urrejtjeje antisemitik, njoftoi Policia Metropolitane.
Ngjarja ndodhi në orët e para të mëngjesit në zonën Golders Green, ku shërbimet e emergjencës u thirrën rreth orës 01:40 pas raportimeve për automjete në flakë. Sipas autoriteteve, katër ambulanca u gjetën të përfshira nga zjarri, ndërsa disa cilindra në to shpërthyen, duke shkaktuar edhe dëmtime në ndërtesat përreth.
Përgjegjësja e policisë lokale, Sarah Jackson, bëri të ditur se hetimet janë në vijim dhe se autoritetet po shqyrtojnë pamjet e kamerave të sigurisë. Ajo shtoi se, në këtë fazë të hershme, dyshohet për përfshirjen e tre personave.
Si masë sigurie, banorët e zonës u evakuuan dhe rrugët u mbyllën përkohësisht. Rreth 30 persona u strehuan në një qendër lokale. Fatmirësisht, nuk raportohet për të lënduar.
Në operacionin për shuarjen e flakëve morën pjesë gjashtë automjete zjarrfikëse dhe rreth 40 zjarrfikës, ndërsa zjarri u vu nën kontroll brenda pak orësh.
Organizata Hatzola, e cila operon që prej vitit 1979, ofron ndihmë mjekësore emergjente falas për komunitetin hebraik në zonë, një prej më të mëdhenjve në veri të Londrës.