Zëvendëspresidentja e Bashkimit Europian, Paola Zacarias, njoftoi se as këtë herë nuk ka çelje negociatash për Shqipërinë dhe Maqedoninë e Veriut.
Shkak është bërë veto-ja e Bullgarisë ndaj Maqedonisë së Veriut, nga e cila u prek edhe Shqipëria.
Ministrja portugeze për Çështjet e Jashtme, Ana Paula Zacarias, vend i cili mbante Presidencën e radhës të BE-së, konfirmoi se nuk u arrit në një konsensus për të miratuar kornizat negociuese për Shqipërinë dhe RMV.
Kjo ishte konferenca e fundit nën Presidencën portugeze dhe Zacarias shtoi se do të jetë Presidenca sllovene ajo që do të vazhdojë përpjekjet për të vendosur sa më shpejt një datë për konferencën e parë të dy vendeve me BE-në.
“Ne e nisëm ditën me bisedimet për zgjerimin. Fatkeqësisht, pavarësisht të gjitha përpjekjeve tona, ishte e pamundur që të arrijmë një dakordësi për mbajtjen e kornizën e negociatave dhe mbajtjen e Konferencës së Parën Ndërqeveritare për Shqipërinë dhe Maqedoninë e Veriut.
Ne shpresojmë se Presidenca sllovene do të mund të arrijë në përcaktimin e datës. Perspektiva evropiane e Ballkanit Perëndimor është një pjesë jetike e Bashkimit Evropian”, tha Zacarias mes të tjerash.
Më herët, ministri gjerman për Europën, Michael Roth u shpreh kundër bllokimit të këtij procesi me dy shtetet ballkanike.
“Bëhet fjalë për besueshmërinë e Bashkimit Europian në Ballkanin Perëndimor. Në Këshillin e ministrave të BE-së do të diskutohet për fillimin e shpejtë të bisedimeve për integrimin e Shqipërisë dhe Maqedoninë e Veriut. Nuk e kuptoj pse vendimet e domosdoshme duhet të bllokohen nga konfliktet dypalëshe”, tha ai.
Këtë herë të gjitha vendet ishin pro hapjes së negociatave për Shqipërinë, madje dhe Holanda, e cila dha Ok para disa ditësh.
Por, konflikti i Bullgarisë me Maqedoninë e Veriut u bë shkak për shtyrjen e hapjes së negociatave edhe për Shqipërinë.