Presidenti amerikan Donald Trump pritet të shkarkojë Richard Grenell nga detyra e kreut të Qendrës Kennedy, sipas tre burimeve të njohura me çështjen.
CNN bën të ditur se ky veprim vjen ndërsa institucioni i arteve dhe kulturës, i cili tani mban emrin ‘Trump’ në fasadën e tij, pritet të mbyllet për dy vjet për rinovime, ndërsa presidenti kërkon ta rimodelojë atë sipas imazhit të tij.
Njoftimi për largimin e Grenell mund të vijë që sot, thanë dy nga burimet.
Mandati i Grenell si president i përkohshëm i Qendrës Kennedy që nga shkurti i vitit 2025 është shenjuar nga trazira, të shoqëruara me anulime të shfaqjeve të profilit të lartë, protesta, rënie të shitjeve të biletave dhe vështirësi financiare, ndërsa ai kërkoi të zbatonte vizionin e presidentit për qendrën e arteve.
Pavarësisht afërsisë së mëparshme midis Trump dhe Grenell, një besnik i hershëm që ka shërbyer në role të ndryshme gjatë dy mandateve të Presidentit në detyrë, mësohet se Trump ishte frustruar nga një mori ‘titujsh negativë’ në lidhje me riorganizimin e tij të institucionit të arteve, thanë burimet.
Një burim i njohur me pikëpamjen e Shtëpisë së Bardhë tha se presidentit i pëlqente Grenell, por mendonte se ai kishte gabuar kur bëhej fjalë për udhëheqjen e Qendrës Kennedy, përfshirë menaxhimin e publicitetit.
Një zyrtar i Shtëpisë së Bardhë këmbënguli se Grenell nuk po shkarkohej, por se ai gjithmonë kishte për qëllim të ndihmonte gjatë periudhës së tranzicionit të Qendrës Kennedy dhe më pas të linte rolin.
Ndërsa drejtonte Qendrën Kennedy, Grenell shpesh kundërshtonte trendet e botës së artit, duke sfiduar traditat dhe duke shtrembëruar normat në fuqi për dekada të tëra, gjë që kritikët pretendojnë se ka sjellë dëm të pariparueshëm për institucionin.
CNN i është drejtuar Grenell dhe Shtëpisë së Bardhë për koment, por ende nuk ka marrë një përgjigje nga ai.