Nga Eduard Zaloshnja
300 petritat që mblidhen në “foltoret” e përjavshme të Berishës para Kryeministrisë kërkojnë me zë të lartë rrëzimin e qeverisë Rama. Zërat e vetmuar të partive të vogla opozitare, gjithashtu.
Po çfarë mund të ndodhë sikur, larg qoftë, Rama të provokojë zgjedhje të parakohshme (që ndryshimet kushtetuese të 2008-ës ia mundësojnë juridikisht)?
Nga sondazhet e fundit që kam zhvilluar, më ka rezultuar se për PD-në e Berishës mund të votojnë sot rreth 360 mijë zgjedhës të këtushëm, ndërsa për partitë e vogla vetëm 75 mijë. Kurse për PS-në, votojnë të paktën 700 mijë zgjedhës të këtushëm (ata të diasporës u pa që anuan dukshëm nga PS-ja).
Nga një ekstrapolim i përafërt statistikor, më rezulton se po të zhvillohen zgjedhje të parakohëshme parlamentare sot, PS-ja mund të sigurojë 93 mandate (nga 83 që ka aktualisht).
Zot na ruaj nga zgjedhje të parakohshme! Se i bie që të shpallet Rama mbret, si dikur Ahmet Zogu…