Shoqëria shtetërore e prodhimit të armëve në Shqipëri ‘KAYO’ tashmë ka marrë autorizimin e qeverisë për të negociuar me qëllim lidhjen e marrëveshjeve me 2 kompani të tjera për prodhimin e mjeteve lundruese dhe dronëve luftarakë në logon e ‘Made in Albania’. Sipas ministrit të Mbrojtjes Ermal Nufi, këto marrëveshje do të jetë nxitje jo vetëm për industrinë ushtarake, por edhe për punësimin.
“Këto dy vendime të Këshillit të Ministrave janë domethënëse, është hera e parë që krijohet mundësia për prodhimin e mjeteve lundruese, kjo është diçka që na bën të ndihemi krenarë dhe jemi afër të finalizimit të marrëveshjeve me këtë autorizim që jep Këshilli i Ministrave. Do të jetë nxitje jo vetëm për industrinë ushtarake, por edhe nxitje për punësimin, krijimin e një hapi të mirëfilltë të ndërtimit të mjeteve lundruese”, tha Ermal Nufi pas mbledhjes së qeverisë.
Kayo do të përfshihet në një shoqëri të përbashkët me gjigandin italian të prodhimit të anijeve ushtarake, Fincantieri, sipas marrëveshjes së mirëkuptimit të firmosur nëntorin e kaluar në Romë. Sipas vendimit të qeverisë, Kayo do duhet të ketë jo më pak se 40 përqind të aksioneve të shoqërisë e cila do të shfrytëzojë kantierin e Pashalimanit.
Për prodhimin e dronëve ushtarakë, partneri ku KAYO do të ketë jo më pak se 25% të aksioneve, do të jetë një shoqëri me bazë në Tajlandë, DrivesVision, me një eksperiencë mbi 20 vjeçare në këtë sektor.
I pyetur nga gazetarët nëse do t’ia lejonte presidentit Trump përdorimin e bazës ushtarake në Kuçovë, ministri i Mbrojtjes Ermal Nufi tha se SHBA-të janë aleatë strategjikë, kurse Shqipëria vend i NATO-s. Si rrjedhojë, baza e Kuçovës është e NATO-s, por mbetet për t’u parë nëse SHBA-të do të parasshtrojnë një kërkesë të tillë.
“Republika e Shqipërisë ka marrëdhënie strategjike me SHBA-të. Që nga viti 2015 kemi marrëdhënie strategjike me ta, përtej angazhimit tonë në NATO. Mbetet për t’u vlerësuar dhe për t’u parë nëse vjen një kërkesë e tillë nga pala amerikane. Baza e Kuçovës është bazë e NATO-s. Besoj se e gjithë vendimmarrja me këtë gjë, lidhet edhe me angazhimin e Shqipërisë në aleancë”, tha Nufi.