Në Gjykatën e Lartë është hedhur shorti për shqyrtimin e rekursit të paraqitur nga ish-zëvendëskryeministrja Belinda Balluku, si edhe nga Gentian Gjyli dhe Erald Elezi. Relator i çështjes është caktuar gjyqtari i Gjykatës së Lartë, Ilir Panda.
Pas hedhjes së shortit, pritet që trupa gjykuese të përcaktojë edhe datën kur do të zhvillohet seanca për shqyrtimin e rekursit. Deri më tani, një afat i tillë ende nuk është bërë publik.
Në këtë proces, Balluku është ankuar vetëm për masën e ndalimit për të dalë jashtë vendit, pasi sipas avokatëve të saj nuk ekziston asnjë rrezik që ajo t’i shmanget drejtësisë.
Një ditë më parë Partia Socialiste doli me një qëndrim zyrtar mbi çështjen, pas afro 3 muajsh nga kërkesa e SPAK për arrestimin e Ballukut.
Për t’i dhënë përgjigje negative kërkesës së SPAK socialistët u bazuan në 4 shtylla, që nga prokuroria ishin sjellë si argumente që legjitimonin arrestin: Rëndimi i akuzës se janë shtuar episodet, rreziku i prishjes së provave, rrezikun i arratisjes apo mundësia për të përsëritur një krim edhe më të rëndë.
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë