8 Dhjetor 1990! Qyteti Studenti…
Revolta studentore përmbysi sistemin komunist në Shqipëri.
Një komunist, nga ata të rangut të lartë, atë natë ngjiste me hapa të mëdhenj të përpjetën e rrugës që të çon në Qytetin Studenti. Të përpjetën e përshkoi si komunist, tatëpjetën, 24 orë më vonë, e zbriti si antikomunist.
Ky ishte Sali Berisha.
Sot, pas 35 vjetësh, ai është shpallur “non grata” nga Shtetet e Bashkuara të Amerikës, flamurin e të cilave ai e valëviste ethshëm në çdo miting. Eshtë shpallur “non grata” për korrupsion madhor, pra për përvetësim të pasurive kombëtare të vendit të tij. Sali Berisha nuk përvetësoi vetëm pasuritë kombëtare, ai përvetësoi të djathtën shqiptare.
E përpjeta e Qytetit Studenti, e çoi atë në majat e pushtetit të ri.
Tashmë i takonte komunistit Sali Berisha të ishte përfaqësues i klasës së të përndjekurve dhe persekutuarve politikë, ironi fati e pamëshirshme. Ai tani ishte përfaqësuesi i shtresës së pronarëve të shpronësuar nga të kuqtë, ku ai skuqte për të shërbyer jo vetëm si mjek, por edhe si komunist i devotshëm. Dhe tradhëtia ndaj kësaj shtrese nuk vonoi: Sali Berisha pagëzoi Reformën Agrare Nr. 2 në historinë e Shqipërisë. Nëqoftëse Enver Hoxha e bëri Reformën Agrare në komunizëm, Berisha ja u bëri “peshqesh” pronarëve legjitimë në pluralizëm, ku prona është e shenjtë. Në fakt, si mund të ndodhte ndryshe kur përfaqësuesi i pronarëve nuk kishte të trashëguar një pronë të vetme, qoftë një rrënje ulli, atje në fshatin e tij të largët?
Sot, pas 35 vjetësh, komunisti i dikurshëm, a është antikomunist? Unë them jo!
Por një gjë është e sigurt: ai sot është vërtet një pronar i madh!/Nga Raimond Cimbi