Ish-presidenti Ilir Meta ka reaguar nga qelia pas deklaratës së kryeministrit Edi Rama këtë të enjte, që tha se Reforma në Drejtësi ishte miratuar me 140 vota në Kuvend.
Në një postim në Facebook, Meta e kundërshton kryeministrin Edi Rama, duke theksuar sipas tij se reforma e vitit 2016 kaloi me 69 vota, dhe jo me 140 si pretendon Rama.
“Tani mora vesh se, Edi Rama ose qenushi i Sorosit, në Pleniumin e tij, paska thënë sërish sot se e kishte bërë ai, me 140 vota, Reformën në Drejtësi.
Dua t’i kujtoj qenushit të Sorosit se reforma e tij dhe dy buzëputhurve, ishte me 69 dhe jo me 140 vota.
Megjithatë, më 22 korrik, me rastin e 10-vjetorit të 140 votave, do ta shohin, të gjithë shqiptarët se si qenushi me gjithë qenushët e tjerë të Sorosit u detyruan jo vetëm ta votojnë Reformën në Drejtësi, siç desha unë (pra Komisioni i Venecias) por edhe të puthen në buzë nga dëshpërimi.
Për historitë e tjera, prisni edhe pak, që të mos e humbni kuriozitetin.
Për këdo që e ka harruar, po ju kujtoj se si i kam thirrur qenushët e Sorosit, për të votuar me 140 vota, Reformën në Drejtësi.
Më poshtë do të gjeni qëndrimin tim, të mbajtur në seancën plenare të 21-22 korrikut 2016, që bëri të mundur miratimin me konsensus të plotë të Reformës në Drejtësi.”-shkruan Meta në rrjetet sociale.