Muli po diskutonte sot se si duhet t’ua shpjegojnë demokratëve faktin që Salianji kishte dhjetë herë më shumë shikues online live se sa Doktori në Korçë.
-Ka një shpjegim – tha Muli. Ne kishim shpërndarë një qarkore ku thuhej se ata që shkojnë në takimin e Salianjit janë njerëz të Benet Becit dhe armiq të PD.
Nga pikëpamja politike kjo është korrekte, se ashtu ishin. Nga ana mediatike i kemi dhënë atij një favor, pasi gjithë PD filloi të shikojë takimin e Salianjit për të kapur tradhtarët.
Kjo nuk tregon se Salianji ka shumë mbështetës dhe shikohet më shumë se Berisha. Kjo tregon se PD është më vigjilente se kurrë dhe i ka sytë te armiku i ri i saj, që mos t’i marrë ndonjë demokrat.
-Shpjegim shumë interesant – tha Lelo. Por puna është se shikueshmëria zgjati deri në fund.
-Ky është kurth i Salianjit – tha Muli. E kuptoi që po e mbikëqyrnim dhe largonte kamerën nga salla e filmonte nga larg, që të mos dukeshin fytyrat e njerëzve. Demokratët më raportonin se po torturoheshin të gjenin ndonjë fytyrë nga afër, po s’po e afronte. Me këtë taktikë i ka mbajtur lidhur deri në fund të takimit.
-E kuptova – tha Lelo. Pra ne duhet të nxjerrim në pah vigjilencën revolucionare të PD kundër armiqve të brendshëm.
-Po – tha Muli. Kjo është arsyeja që njerëzit kanë sytë nga salla e Salianjit. Kurse te Doktori s’kanë çfarë shikojnë, se janë të sigurt që janë të gjithë demokratë që këpusin zinxhirë.
Muli shpjegon pse Salianji kishte dhjetë herë më shumë shikues online në Shkodër se Doktori në Korçë
