Agjencia hapësinore amerikane, NASA, njoftoi të premten ndryshime të mëdha në misionin Artemis III, i cili synonte të kthejë njerëzit në Hënë për herë të parë pas më shumë se gjysmë shekulli. Ndryshimet vijnë pas problemeve teknike dhe kritikave se agjencia po përpiqet të bëjë shumë gjëra njëkohësisht.
Administratori i NASA-s, Jared Isaacman, deklaroi se misioni Artemis III nuk do të synojë më uljen e njerëzve në Hënë. Në vend të kësaj, një fluturim paraprak do të kryhet për të testuar teknologjitë kyçe dhe për të dhënë ekipit të NASA-s përvojë shtesë. Ky fluturim pritet të nisë rreth mesit të vitit 2027, duke u mbajtur në orbitën e ulët të Tokës.
Si pjesë e këtij ndryshimi, misioni Artemis II, që kishte për qëllim të dërgonte njerëz rreth Hënës këtë vit pa ulje, do të shtyhet nga nisja e planifikuar më 6 mars në 1 prill.
Qasja e re graduale synon të përgatitë misionin për uljen e njerëzve në Hënë në vitin 2028 përmes një misioni të ri, Artemis IV, duke testuar dhe rafinuar sistemet jashtëzakonisht komplekse të fluturimit hapësinor.
“Të gjithë bien dakord që kjo është e vetmja rrugë përpara… E di që kështu e ndryshoi NASA botën dhe kështu do ta bëjë përsëri”, tha Isaacman.
Paneli këshillues i sigurisë hapësinore ka rekomanduar rishqyrtimin e objektivave të Artemis III për të siguruar suksesin e ardhshëm të programit.
Nëse gjithçka shkon sipas planit, NASA do të rikthejë njerëzit në Hënë pas 56 vitesh, duke nisur me Artemis IV në vitin 2028.