Gjykata e Beratit ka dënuar me burgim të përjetshëm Luan Marën, si autor i masakrës së Kozares në vitin 2006. Mara është dënuar për vrasjen e vëllait të tij Shpëtim Mara, të kunatës Florie Mara dhe djalit të tyre dy vjeçar.
“Masakra e Kozarës”, një ngjarje që tronditi mbarë opinionin publik në shkurt të 2006-ës, është rikthyer për gjykim. Në seancën e sotme, Gjykata e Beratit ka vendosur burgim të përjetshëm ndaj Luan Marës, i cili akuzohet se vrau me breshëri automatiku vëllain e tij, Shpëtimin, gruan shtatzënë të këtij të fundit dhe djalin e mitur të çiftit. Mbi Luan Marën rëndon akuza për “Vrasje” dhe “Armëmbajtje pa leje”.
NGJARJA
Më 9 shkurt 2006 në fshatin Kozarë, në afërsi të Kuçovës, u vranë në shtëpinë e tyre tre pjesëtarët e një familjeje të re, ndërsa vrasja është konsideruar e katërfishtë, pasi njëra nga viktimat ishte një grua shtatzënë. Të vrarë nga të shtënat e një arme zjarri mbetën Shpëtim Mara, 35 vjeç, bashkëshortja e tij Florie Mara shtatzënë dhe fëmija 2-vjeçar, Artiol Mara.