Ai është padyshim një ndër aktorët më të dashur shqiptar. Edhe pse u lind në 8 dhjetor 1942 në Athinë, Viktor Zhusti e zhvilloi karrierën në Shqipëri.
Ka luajtur shumë role dhe përpara viteve ’90. Kur lulëzonte veprimtaria në Kinostudio Shqipëria e Re, ishte një nga aktorët më të kërkuar. Galeria e roleve të Viktor Zhustit është e pasur.
Ka luajtur partizanin e ashpër, por edhe babain e dhembshur, të riun përpara dilemave, por edhe të dashuruarin, që mundohet të tejkalojë paragjykimet.
Disa prej filmave ku ai ka luajtur, mund të përmendim telekomedinë “Shi në Plazh”, ku luan rolin e Alber-it, një nga komeditë më të bukura shqiptare, që i ka rezistuar kohës. Për të vijuar me filmin “Nëntori i dytë”, ku luan rolin e Pandeli Sotirit, “Taulanti kërkon një motër”, rolin e babait, Pirros.
Një tjetër rol babai, tek “Kur xhirohej një film”, për të vazhduar me rolin e Llano Bletës tek “Dhe vjen një ditë”, “Malet me blerim mbuluar”, etj.
Roli i doktorit në skenën e teatrit Kombëtar me ‘Të gjithë kanë huqe’ e kthen atë pas gati 20-vjetësh sërish në vëmendjen e publikut.
Pas largimit në Greqi, në vitin 1991, Viktor Zhusti u arrestua ne 1998. Mediat e atëhershme e komentuan me të madhe arrestimin e Viktor Zhustit, i cili u kap me 11 kilogramë heroinë. Ai u dënua me 18 vite burg, por kreu vetëm 4.
“Vuajta mendjelehtësinë time”, – u shpreh ai në një intervistë të disa viteve me parë.
“Unë nuk u përzjeva vetë, por përzjeva emrin tim. Kjo ishte më shumë një grackë e policisë greke. Këtë tha edhe prokurori i çështjes, që i vetmi faj i këtij njeriu është që ndërmjetësoi me emrin e tij. Megjithatë unë vuajta mendjelehtësinë time. Në ndonjë rast tjetër ndodh që mendjelehtësinë ta paguash edhe me kokë.”, u shpreh ai.