Analisti Baton Haxhiu, i ftuar në emisionin “Të Paekspozuarit”, ka deklaruar se Fatmir Xhafaj, nuk duhet të merrte detyrën si ministër i Brendshëm, për shkak të dënim të vëllait të tij në Itali për trafik ndërkombëtar narkotikësh.
“Shqipëria është në periudhën e reformës në gjyqësor dhe policisë nëpërmjet vettingut.
Përveçse nga Gjykata Kushtetuese dhe nivelet e poshtme, pothuajse të gjitha janë në paralizë për shkak të keq menaxhimit të vettingut.
Edhe në polici ekziston procesi i vettingut, që duhet të prekte edhe ministrin Xhafaj. Këtu është morali i punës.
Për shkak të Agron Xhafaj, ministri Xhafaj nuk duhet të merrte detyrën”, tha Baton Haxhiu.
Sakaq, Haxhiu ka deklaruar se opozita e vendit, e ka përdorur këtë çështje në mënyrë të pacipë, për të penguar integrimin.
“Por ekziston një pjesë e tretë që ka të bëjë me opozitën e cila e ka përdorur në mënyrë të pacipë momentin e një dobësie të pushtetit.
Në ditën kur po mbahej Samiti i Sofjes, doli një gjë e tillë, që ka qenë në sirtarët e secilit, 4 ose 6 muaj më herët.
Si është e mundur që kjo çështje doli në ditën kur mbahej samiti? Kur po flitet për hapjen e negociatave të Shqipërisë”, deklaroi ai.