Edhe këtë të shtunë Adriatik Lapaj dhe mbështetësit e tij që janë pozicionuar para Kryeministrisë prej të hënës së 8 tetorit në shenjë proteste, duke kërkuar dorëheqjen e kryeministrit Edi Rama, janë përplasur me forcat e policisë.
Ka qenë një gjenerator i vendosur nga Lapaj për të prodhuar energji elektrike me qëllim ndezjen e ngrohëseve, shkaku që Policia e Shtetit dhe Policia Bashkiake zbarkuan para godinës qeveritare. Këta të fundit pretendojnë se me anë të gjeneratorit, i cili ishte dhe i ndezur, është zaptuar hapësira publike.
U desh që Lapaj të mos ndihej mirë dhe të humbte ndjenjat që konfrontimi fizik mes protestuesve dhe policisë të shuhej. Kreu i partisë “Shqipëria Bëhet” i paraqiti efektivëve të Policisë Bashkiake dokumentacionin, që sipas Lapajt, është depozituar pranë Policisë së Shtetit dhe Bashkisë, për protestat e përditshme dhe lidhjen me energjinë elektrike.
Pas përmirësimit, Lapaj u ngjit mbi gjeneratorin që policia kërkonte të largonte nga sheshi para kryeministrisë dhe kërkoi dorëheqjen e qeverisë.
Sipas kreut të “Shqipëria Bëhet” gjeneratori është sjellë nga Dritan Toci, i cili jeton në Londër, dhe u zotua se për sakrificën e këtij emigranti nuk do të lejojë sekuestrimin.