Modelja dhe muzikantja e lindur në Shqipëri Barbara Prezia pritet të jetë një nga emrat e rinj që do t’i bashkohet edicionit të radhës të reality-show-t Grande Fratello VIP.
Sipas raportimeve nga mediat italiane të showbiz-it, ajo është në listën e personazheve që do të hyjnë në shtëpinë më të famshme në Itali, në një sezon që do të moderohet nga Ilary Blasi.
Prezia nuk është një emër i panjohur për publikun italian. Ajo u bë më e njohur në vitin 2023, kur mori pjesë në aventurën televizive Pechino Express, ku garoi në çift me Carolina Stramare. Pikërisht pas këtij formati, profili i saj mediatik njohu një rritje të dukshme.
E lindur më 9 nëntor 1991 në Durrës, Barbara u zhvendos në Itali që në fëmijëri dhe u rrit në Ravenna, ku edhe hodhi hapat e parë drejt botës së artit dhe modës.
Përtej karrierës si modele, ajo ka kultivuar prej vitesh pasionin për muzikën dhe letërsinë, duke studiuar kitarë dhe këndim që në moshë të re. Paralelisht, ka qenë e angazhuar edhe në projekte artistike dhe evente të ndryshme në Itali, duke ndërtuar një profil të kombinuar mes modës dhe skenës muzikore.
Nëse konfirmohet zyrtarisht hyrja e saj në “Grande Fratello VIP”, Barbara Prezia do të jetë një tjetër përfaqësuese shqiptare në një format të madh televiziv italian. Historia e saj personale, formimi artistik dhe rruga e ndërtuar mes dy vendeve pritet ta bëjnë një nga personazhet më interesante të këtij edicioni.
