Guido Olimpio
9 Mars, 18:07 | Përditesimi: 9 Mars, 18:15
Share
Rrit madhesinë e shkrimit Zvogëlo madhesinë e shkrimit
Abolghasem Babeian u vra të shtunën në Teheran. Pothuajse në të njëjtën kohë u vranë edhe disa oficerë të tjerë në Bejrut. Janë objektivat më të fundit të një lufte brenda luftës mes Izraelit, të mbështetur nga SHBA, dhe aparatit ushtarak iranian.
Gjithçka mori një kthesë të madhe më 20 janar 2020, kur një sulm amerikan në Bagdad vrau gjeneralin Qasem Soleimani, komandantin e forcës Qods të Gardës Revolucionare iraniane. Ai ishte strategu që për dekada kishte ndërtuar rrjetin e milicive shiite në Lindjen e Mesme, të njohur si “Boshti i Rezistencës”.
Soleimani ishte një figurë që lëvizte mes politikës dhe fushës së betejës. Shfaqej aty ku duhej për të koordinuar operacionet dhe për të mbajtur të bashkuar aleatët. Për këtë arsye presidenti Donald Trump autorizoi eliminimin e tij.
Pas kësaj, Izraeli intensifikoi fushatën e sulmeve të synuara kundër komandantëve iranianë dhe aleatëve të tyre, paralelisht me operacionet kundër Hamasit dhe Hezbollahut.
Lista e goditjeve është e gjatë. Në shtator 2023 gjenerali Abbas Nilforoushan u vra në një bunker në Bejrut bashkë me liderin e Hezbollahut Hassan Nasrallah. Streha e tyre u shkatërrua nga bombardimet.
Më 25 dhjetor 2023 në Damask u vra Sayed Mousavi, një tjetër drejtues i forcës Qods. Një muaj më pas, më 20 janar 2024, në të njëjtin qytet u godit gjenerali Sadegh Omidzadeh bashkë me katër bashkëpunëtorë të tij.
Në prill të atij viti ndodhi një tjetër përshkallëzim: raketat izraelite goditën konsullatën iraniane në Damask për të eliminuar Mohammed Zahedi, ish-drejtues i sektorit ajror dhe përgjegjës i forcës Qods për Libanin dhe Sirinë.
Një vit më vonë në Liban u vra edhe Hassan Badir, i konsideruar si hallka lidhëse mes Gardës Revolucionare iraniane dhe njësisë speciale të Hezbollahut. Lista e humbjeve është edhe më e gjatë nëse përfshihen komandantët e nivelit të mesëm.
Në qershor 2025, gjatë luftës 12-ditore, Izraeli vazhdoi të godiste hierarkinë ushtarake iraniane. Operacionet synonin të dobësonin strukturën e komandës, por nuk arritën të paralizonin plotësisht aftësinë e reagimit të Teheranit.
Përkundrazi, kjo përvojë e shtyu Iranin të riorganizojë zinxhirin e komandës për t’i mbijetuar sulmeve të vazhdueshme.
Struktura e re po testohet edhe në konfliktin aktual. Sipas raportimeve, ajo vazhdon të funksionojë dhe të përgjigjet me sulme ndaj bazave amerikane në Gjirin Persik dhe ndaj monarkive sunnite që mbështesin Uashingtonin.
Edhe Hezbollahu, pavarësisht humbjeve në drejtim, vazhdon operacionet. Grupi ka përdorur dronë kamikazë kundër Izraelit dhe objektivave pranë Qipros.
Me operacionin e quajtur “Rrugëtimi i Luanit”, ushtria izraelite rifilloi gjuetinë ndaj komandantëve iranianë. Në orët e para të sulmit u vranë disa gjeneralë dhe edhe udhëheqësi suprem Ali Khamenei, së bashku me zyrtarë të tjerë që kishin marrë postet vetëm pak muaj më parë.
Mes tyre përmendet edhe Yahya Panjaki, një funksionar i shërbimit sekret iranian MOIS. Ai kishte qenë në qendër të hetimeve amerikane dhe britanike për dyshime se drejtonte rrjete operative në Perëndim që organizonin sulme kundër kundërshtarëve të regjimit iranian jashtë vendit.
Sipas disa hetimeve, këto rrjete bashkëpunonin edhe me grupin kriminal Zindashti, një organizatë trafiku droge që vepron në disa vende dhe që dyshohet se ka ndihmuar në organizimin e sulmeve dhe në rekrutimin e anëtarëve të bandave për operacione të fshehta.
Fundjavën e fundit, Izraeli ndërmori një tjetër valë sulmesh. Në Teheran u vra Abolghasem Babeian, i përshkruar si një nga këshilltarët ushtarakë të Ali Khameneit.
Sipas versionit izraelit, avionët luftarakë goditën zyrën ku ndodhej ai vetëm 50 minuta pasi ishte identifikuar vendndodhja e tij.
Në Bejrut ndërkohë ndërhyri marina izraelite, duke lëshuar një raketë që goditi disa dhoma të hotelit Ramada. Sipas Izraelit, në sulm u vranë të paktën katër anëtarë të forcës Qods, mes tyre edhe Daoud Ali Zadeh, që konsiderohej përgjegjës për dosjen e Libanit./CorrieredellaSera