Dita e Verës simbolizon fillimin e një stine plot ngjyra, lule dhe gëzim. Festa ka nisur që në mbrëmjen e 13 marsit kur përgatiten ëmbëlsirat siç është ballokumja që s’mund të mungojë dhe ushqimet tradicionale.
Një nga simbolikat e kësaj feste është verorja me pe të bardhë e të kuq.
Çdo qytet ka planifikuar një sërë aktivitetesh e festimesh për të kremtuar këtë ditë, si dhe janë marrë masat për kufizimin e qarkullimit të automjeteve.
Në Tiranë, devijimi i trafikut ka nisur prej orës 12:00 të datës 13 mars dhe do të vijojë deri në orët e para të datës 15 mars. Aktivitetet festive do të nisin që në orët e para të ditës së sotme dhe do të përfundojnë vonë pas mesnate. Rreth 50 veprimtari të ndryshme janë programuar në kryeqytet, nga ora 09:00 e mëngjesit e deri në mesnatë.
Për të gjitha grupmoshat janë dedikuar hapësira të veçanta, sidomos për fëmijët që janë parashikuar aktivitete te Liqeni Artificial dhe Parku Rinia.
Plani i kufizimit të lëvizjes do të ndiqet edhe në Elbasan, kryeqendrën e festimeve të Ditës së Verës.
Sot pritet një numër shumë i lartë vizitorësh në Elbasan, të cilët pritet të vijnë jo vetëm nga trevat shqipfolëse, por edhe nga shtete të Europës.
Në prag të Ditës së Verës, Elbasani festoi në sheshin kryesor me një koncert të madh, ku qindra qytetarë dolën për të festuar.
Një ditë më parë u çel Panairi i Ballokumeve, janë zhvilluar koncerte për fëmijë, si dhe shfaqje të teatrit të rrugës me maskota. Festimet vijuan me parakalimin e grupeve folklorike nga gjithë trevat e vendit.
Për herë të parë u çel edhe panairi bujqësor “Nga toka jonë në sofrën tuaj” me pjesëmarrjen e 54 subjekteve.