Parlamenti hungarez i ka hequr imunitetin kryeministrit dhe kreut të partisë TISZA, Peter Magyar, duke i hapur rrugë hetimit ndaj tij për një ngjarje të ndodhur në Budapest në vitin 2024.
Vendimi u mor këtë të hënë gjatë një seance të jashtëzakonshme të Parlamentit, ku iu hoq imuniteti edhe dy deputetëve të tjerë.
Magyar kërkoi vetë që deputetët të votonin për heqjen e imunitetit të tij. Gjatë fjalës në Parlament, ai kritikoi Prokurorinë e Përgjithshme dhe akuzoi qeveritë e mëparshme për provokime, duke i cilësuar ato si “mafia”.
Çështja ndaj kryeministrit lidhet me një incident të qershorit 2024. Sipas “Hungary Today”, Magyar akuzohet se gjatë një mbrëmjeje në një klub nate i mori telefonin një personi dhe më pas e hodhi në lumë.
Për këtë ngjarje, ai akuzohet për vjedhjen e një sendi me vlerë të vogël sipas Kodit Penal hungarez.
Magyar i ka mohuar vazhdimisht akuzat dhe e ka cilësuar çështjen të motivuar politikisht dhe një “farsë”.
Në vitin 2025, Parlamenti Europian refuzoi t’i hiqte imunitetin që Magyar gëzonte në atë kohë si eurodeputet. Pasi u bë kryeministër, prokurorët hungarezë i kërkuan Parlamentit kombëtar heqjen e imunitetit të tij.
Në të njëjtën seancë, Parlamenti i hoqi imunitetin edhe ish-ministrit të Kulturës, Balazs Hanko, deputet i FIDESZ, si dhe deputetit kristiandemokrat Miklos Sesztak.
Sipas “Hungary Today”, Sesztak më pas u paraqit te prokurorët dhe u arrestua nën dyshimet për korrupsion.
Para seancës së jashtëzakonshme, kreu i grupit parlamentar të FIDESZ, Janos Boka, njoftoi se grupi nuk do të merrte pjesë, duke thënë se nuk dëshironte të bëhej pjesë e asaj që e cilësoi si një “shfaqje politike me kukulla”.
Edhe Hanko ka deklaruar se hetimi ndaj tij është i motivuar politikisht dhe synon ta frikësojë. Pas paraqitjes para Komisionit të Imunitetit, ai tha se kishte kundërshtuar një për një pretendimet e ngritura ndaj tij.