Luiza Xhuvani dhe Alfred Trebicka u ngjitën parmbrëmë në skenën e Teatrit të Metropolit, si një çift, i cili përballet me shpërbërjen e martesës.
Përmes një humori të hollë, grindjeve të zgjatura deri në përballje të forta fizike, dy protagonistët eksploruan dashurinë, tradhtinë, zhgënjimin, konsumimin njerëzor dhe dilemën e vazhdueshme se çfarë është martesa. Kur kemi një martesë të shëndetshme dhe kur jo?
Shfaqja “Si ne të dy” bazohet në veprën “Lojë martese” të Edward Albee.
Vite më parë, kjo dramë u vu në skenën e Teatrit Kombëtar, me protagonistë çiftin Trebicka. Tashmë Violeta Trebicka vjen si regjisore dhe roli i Gillian interpretohet nga e mirënjohura, Luiza Xhuvani.
Shfaqja sjell përpara publikut krizën në familje, të kapur në një moment kulmor, por që ka qenë aty prej 30 vitesh duke e bashkëshoqëruar marrëdhënien e çiftit hap pas hapi. Për autorin kriza është brenda natyrës njerëzore dhe për asnjë çast nuk i jep asaj karakter social.
Adhuruesit e teatrit do të mund të shohin edhe sonte në mbrëmje dramën “Si ne të dy”, në Teatrin e Metropolit.