Dy persona kanë vdekur dhe disa të tjerë janë plagosur pasi një makinë u përplas në një turmë në qytetin lindor gjerman të Leipzigut të hënën pasdite, 4 maj.
Kryetari i bashkisë Burkhard Jung tha se i dyshuari është arrestuar, duke shtuar se autoritetet ende nuk e kanë të qartë motivin.
Shefi i zjarrfikësve të Leipzigut, Axel Schuh, tha se 22 persona janë plagosur, dy prej tyre rëndë.
Rreth 40 zjarrfikës dhe 40 ndihmësmjekë janë në vendngjarje, së bashku me dy helikopterë, tha Schuh. Policia konfirmoi se një makinë kishte goditur disa persona në zonën qendrore të rrugës Grimmaische Straße përpara se të largohej.
Shoferi u arrestua më vonë dhe “aktualisht nuk ka më rrezik që vjen prej tij”, sipas policisë.
Rreth orës 17:35, Radio Leipzig raportoi se policia tha se rreziku kishte përfunduar dhe zona përreth sheshit ishte rrethuar.
Imazhe të paverifikuara të publikuara në rrjetet sociale tregonin një helikopter emergjence të verdhë pranë vendit të ngjarjes, si dhe disa ambulanca.