Nga 13 Prilli i këtij viti me frekuencë 2 herë në javë nisin fluturimet direkte nga Shqiperia ne Tel Aviv. Lajmin e ka dhënë ministri Shqiptar i Turizmit, Blendi Klosi pas një takimi që pati me homologun e Izraelit, Yariv Levin, në vizitën zyrtare në Tel Aviv, me ftesë të homologut izraelit.
“Pritshmëria është”-, tha ministri Klosi,- “të disafishohet numri i turistëve izraelitë në Shqipëri, duke shkuar drejt 50 mijë vetë në vit”.
Ministri Klosi shtoi se në destinacionet turistike të Shqipërisë, turistëve izraelitë do t’u ofrohet përveç të tjerave, edhe rrugëtimi historik i hebrenjve në Shqipëri, si vendi i rrallë në botë që numëron më shumë hebrenj në mbarim të Luftës së 2-të Botërore sesa në fillim të saj.
Ministri Levin përshendeti nismën konkrete të bashkëpunimit mes dy vendeve, atë të lidhjes direkte të fluturimeve, si një mekanizëm që do të nxisë më tej shkëmbimet turistike.
Ministri Levin vlerësoi se marrëdhëniet mes dy vendeve, Shqipërisë dhe Izraelit, po vijojnë të përforcohen edhe në dimensionin ekonomik.
“Është një miqësi e lindur në kohët e vështira të Luftës së Dytë, kur shqiptarët u bënë dera e mikpritjes së mijëra familjeve hebreje”-, tha ndër të tjera ministri Levin duke përcjellë vlerësimet dhe mirënjohjen e qeverisë dhe popullit të tij.
Kjo miqësi po zhvillohet në rrafshin ekonomik, vijoi ministri i Turizmit të Izraelit, duke shprehur interesin në rritjen e komunikimit të agjensive turistike mes dy vendeve, Shqipërisë dhe Izraelit.
Ministri Shqiptar i Turizmit, Blendi Klosi bëri një paraqitje të nismave të fundit të qeverisë shqiptare për nxitjen e investimeve në fushën e turizmit, në lehtësirat fiskale për ndërtimin e hoteleve dhe resorteve me 4 dhe 5 yjeve.
Ministri Klosi ftoi homologun izraelit për vizitë zyrtare në Shqipëri, ftesë të cilën homologu izraelit e mirëpriti me kënaqësi.