Protestues me maska në selinë e PD, Berisha i merr në mbrojtje: PD strehë për çdo të mitur që përndiqet nga policia

“Njeriu që po përpiqet të përzgjedhë vendin e azilit politik, dhe i them para shqiptarëve se vendi i vetëm i azilit do të jetë qelia e burgut. Sot, ai përhapi nëpërmjet rrjetit të tij brenda në protestë lajmin se Kryeministrinë nuk e marrim dot, ndaj duhet të sulmohen dy selitë e dy partive të mëdha. Ai futi në selinë e PS-së tre inspektoriate, banditë të armatosur. Skenari i dështoi, sepse puthadorët e Ramës në këtë lëvizje nuk i ndoqi njeri. Jo, i thanë, nuk kemi asnjë punë, ata janë në protestë me ne dhe ne nuk vijmë. Dështoi të sillte protestuesit që shprehnin urrejtjen ndaj partisë së krimit.

Policia dhunon territorin e PD-së, në shkelje të rëndë të ligjeve dhe të Kushtetutës. Jo vetëm që hedhin sasi të stërmëdha bombolash gazi pa pasur asnjë lloj motivi, por këto janë vetëm reprezalje ndaj PD-së për dështimin e skenarit të tyre. Sasitë e gazit kanë qenë kolosale, i kanë helmuar njerëzit, ju e patë vetë. Nuk ka pasur asnjë tentativë, asnjë përpjekje nga asnjë protestues që të kryejë aktin më të vogël ndaj selisë.

E paralajmëroj Edi Ramën se demokratët janë në mosbindje civile më shumë se kurrë. Janë jo vetëm në Tiranë, por janë dhe do të jenë në katër anët e vendit. Regjimi nuk ka më paqe dhe qetësi. Nesër është ditë mosbindjeje civile në mbarë vendin.

Çdo i mitur do të mbrohet. Mbrojtja e të miturit është detyrë themelore e çdo të rrituri. Ata që sulmojnë të miturit shkelin ligjet dhe Kushtetutën e vendit. I përgëzoj demokratët që i kanë marrë në mbrojtje. Ky është narkoshtet që sulmon të miturit.

Maska kanë të gjithë njerëzit sot, për shkak të gazit. Këta janë kriminelë. Sillen si kafshë ndaj protestuesve. Njerëzit nuk rrinë dot në oborr. Të miturit janë të mirëpritur të vijnë, ata do të gjejnë këtu mbrojtje, do të gjejnë mbështetje për çdo nevojë që mund të kenë”, tha Berisha.