Dalja e Salianjit nga burgu, përveç të tjerave, e bëri xheloz Mulin.
E para gjë që e xhelozoi ishte thirrja e konferencës për shtyp në seli, pa dijeninë e tij.
— Unë nuk mund ta marr vesh i fundit që Salianji do bëjë konferencë shtypi, i tha Lelos.
— Nuk mund ta ndaloja, i tha Lelo. Na duhet ta heroizojmë pak.
— Këtu është puna, tha Muli.
Ai nuk mund të hiqet si hero i burgjeve.
Heronjtë e burgjeve janë Doktori dhe familja e tij.
Dhe u lirua superdhëndri, e nuk bëri konferencë shtypi.
Si mund t’ia lejojmë këtij?
— Tani u bë, tha Lelo. Na prish më shumë punë ta ndalojmë.
Plus që gjithë këta deputetët e 8 janarit janë me të.
E kanë si lider tani.
— Po këtu është problemi, tha Muli.
Ai duhet të kuptojë që thjesht ka dalë nga burgu, por nuk është bërë udhëheqës.
Se ky as dhëndër brenda nuk quhet më.
— Nejse, mirë është ta takosh, i tha Lelo.
— Patjetër do ta takoj, tha Muli, por më bëri përshtypje që i qenë rritur flokët dhe i dukeshin shumë natyrale.
Ne jemi thinjur duke e mbrojtur atë, ai shkoi në burg, u bë dhe me flokë, kurse ne na kanë rënë flokët duke shkulur qimet për burgun e tij.
— E, shumë mirë i kanë mbirë, tha Lelo.
Por këtë pjesë e mbulon Grida.
Ajo ia ka mundësuar këtë dizajnin e ri të flokëve.
— Epo kështu e nisin këta, tha Muli.
Mbjellin flokë e pastaj mendojnë që u takon dhe post në parti.
Ndaj duhet bërë kujdes.