Pasi fitoi Topin e Artë, Ousmane Dembélé ka kurorëzuar një vit të jashtëzakonshëm edhe me çmimin e lojtarit më të mirë të FIFA-s për futbollistin më të mirë të vitit.
Sulmuesi francez e pranoi çmimin nga Doha, ku PSG do të përballet me Flamengon në finalen e Kupës Ndërkontinentale. Dembélé la pas Kylian Mbappé dhe talentin e ri Lamine Yamal. Megjithatë, Mbappé mbeti jashtë edhe listës së 11 më të mirëve të vitit, pavarësisht se fitoi “Këpucën e Artë”.
Dembélé luajti një rol vendimtar në triumfin e parë të PSG-së në Ligën e Kampionëve, kur ata mposhtën Interin 5-0 në finale, dhe shënoi 35 gola sezonin e kaluar në të gjitha garat, përfshirë 21 në Ligue 1, për të përfunduar si golashënuesi më i mirë. 28-vjeçari, i cili fitoi Topin e Artë të këtij viti në shtator, ishte pjesë e ekipit të PSG-së, i cili gjithashtu i rrëmbeu të gjitha trofetë vendas sezonin e kaluar dhe arriti në finalen e Kupës së Botës për Klube.
Ceremonia “The Best 2025” konfirmoi gjithashtu dominimin e PSG-së, me disa lojtarë të përfshirë në ekipin më të mirë të vitit. 11-shja përbëhet nga Donnarumma në portë; Hakimi, Pacho, Van Dijk dhe Nuno Mendes në mbrojtje; Palmer, Bellingham, Vitinha dhe Pedri në mesfushë; si dhe Lamine Yamal dhe Ousmane Dembélé në sulm. Trajneri i vitit 2025 u zgjodh Luis Enrique.
Gianluigi Donnarumma, i cili tani luan për Manchester City, fitoi çmimin e portierit të meshkujve për rolin e tij në fitoren e tripletës së Paris Saint-Germain. Mesfushorja e Spanjës dhe Barcelonës, Aitana Bonmatí, fitoi çmimin e vajzave për të tretin vit radhazi. Sarina Wiegman fitoi çmimin e trajneres më të mirë të femrave për herë të pestë, pasi udhëhoqi Anglinë drejt mbrojtjes së titullit të Kampionatit Evropian.
Santiago Montiel fitoi Çmimin Puskas për golin më të mirë të meshkujve pas goditjes spektakolare në një ndeshje të kampionatit argjentinas. Lizbeth Ovalle e Meksikës fitoi Çmimin FIFA Marta për golin më të mirë në futbollin e femrave, për goditjen e saj “akrep” për Tigres-in kundër Guadalajara-s në mars.