Aksidenti tragjik në zonën e Ish-kënetës, ku 2 fëmijë u përplasën për vdekje nga një automjet, ka rritur ndjeshmërinë e qytetarëve ndaj shoferëve që kryejnë manovra të rrezikshme.
Shqetësimi i banorëve të fshatit Arapaj për një rast të shkeljes së rregullave të qarkullimit rrugor ka përfunduar në ambientet e komisariatit të policisë, ku ata kërkojnë marrjen e masave ndaj drejtuesit të automjetit.
Sipas banorëve, 22-vjeçari Albi Bizgjoni është kthyer prej kohësh në një shqetësim serioz për fshatin.
“Ai më ka dalë mbrapa dhe më ka goditur me makinë, ka ardhur dhe policia pastaj, por ai ka dhënë deklarata se po më kërcënojnë dhe po më vrasin. Ka shumë problematika në lagje, të gjitha fajet janë të atij. Sa herë kemi ardhur në polici dhe problemi nuk është zgjidhur. Kemi ardhur që në orën 6 dhe asnjë përgjigje nuk kemi marrë. Për batrë bë o polic, asgjë nuk po zgjidhet, kalamajtë po na fillojnë, o na i kërcënojnë”,- thotë një banore.
Pas incidentit, banorët i janë drejtuar Policisë Aktualisht, pesë prej tyre ndodhen në komisariat, ku po zhvillojnë një takim me drejtuesit e policisë për të paraqitur shqetësimin.
Banorët shprehen se ata nuk do të largohen nga ambientet e policisë derisa të merret një masë konkrete ndaj drejtuesit të automjetit.
Për më tepër, ata theksojnë se edhe motra e 22-vjeçarit, e cila thuhet se ndjek shkollën e policisë, ka dhunuar disa prej bashkëfshatarëve. Gjithashtu, vetë blutë, më 26 prill e kanë proceduar 20-vjeçaren nën dyshimet se ka goditur me thikë një person.
“Specialistët për Hetimin e Krimeve të Komisariatit të Policisë Durrës referuan materialet në Prokurori, ku nisi procedimi penal për shtetasen S. B., 20 vjeçe, banuese në fshatin Arapaj, Durrës, e cila pas një konflikti, ka goditur me mjet prerës një 31-vjeçare, duke i shkaktuar lëndime të lehta”,- njoftonte policia.