Donald Trump ka ngatërruar sërish letrat dhe ka bërë një njoftim surprizë për pezullim “të përkohshëm” të operacionit Liria, nismës ushtarake të SHBA-ve që synon të shoqërojë anijet tregtare jashtë Ngushticës së Hormuzit.
Në një postim në Truth Social, presidenti amerikan shpjegoi se vendimi bazohet pjesërisht në “faktin që janë bërë përparime të mëdha drejt një marrëveshjeje të plotë dhe përfundimtare” me Iranin.
Operacioni Liria, për rrjedhojë, “do të pezullohet për një periudhë të shkurtër kohe, për të verifikuar nëse marrëveshja mund të finalizohet dhe nënshkruhet”, vijoi ai më tej.
Trump njoftoi se bllokada detare do të mbetet në fuqi.
Media shtetërore e Iranit e përshkroi këtë veprim si një “tërheqje” pas “dështimeve të vazhdueshme” të Donald Trump për të rihapur këtë rrugë ujore jetike për transportin global.
Lëvizja erdhi pas episodeve të përsëritura që kanë ngritur frikën për prishjen e armëpushimit të brishtë dhe pas thirrjes së sekretarit të Shtetit Marco Rubio ndaj Iranit që “të bëjë një zgjedhje të arsyeshme” dhe të ndjekë rrugën diplomatike që mund të çojë në “rindërtim, begati dhe stabilitet, dhe të mos përbëjë më një kërcënim për botën”. Irani, tha Rubio, duhet “të pranojë realitetin e situatës” dhe të ulet në tryezën e negociatave, duke pranuar kushte që janë të favorshme jo vetëm për veten, por edhe për botën. “Nuk duhet absolutisht të vënë në provë vullnetin e SHBA-ve”, shtoi ai.