Njësia Speciale ka hyrë brenda në Manastirin e Banjskës, ku është ngujuar grupi kriminal i armatosur në komunën e Zveçanit.
Sipas Klan Kosovës, ka mundësi që aksioni të përfundojë brenda orës.
Kujtojmë se sot në orët e hershme të mëngjesit, një grup i organizuar dhe i armatosur ka hapur zjarr ndaj pjesëtarëve të Policisë së Kosovës, ku si pasojë një polic ka humbur jetën dhe dy të tjerë kanë mbetur të lënduar.
Xhelal Sveçla ka zbuluar për mediat se çfarë ka arritur të sekuestrojë policia e Kosovës nga 30 serbët që u ngujuan në Manastir pasi vranë policin Afrim Bunjakun.
Sveçla tha se janë sekuestruar armatura të rënda, eksploziv, uniforma, logjistikë si dhe qindra pajisje për barrikada. Ministri theksoi se pajisjet ishin për qindra sulmues të tjerë.
“Policia e Kosovës zbuloi një sasi të jashtëzakonshme armatimi të rëndë, eksploziv, uniforma, logjistikë, ushqime, pajisje për barrikada.
Mund të themi, se ishin pajisje për disa qindra sulmues të tjerë. Përgatitjet ishin që në mënyrë masive të sulmonin policinë e Kosovës, institucionet në Kosovës dhe të cenojnë sovranitetin e vendit.”- tha Sveçla.