Në dosjen “e zezë” të britanikëve për ish-kryeministrin Sali Berisha përmendet roli i vajzës së tij, e cila akuzohet se u merrte ryshfet investitorëve të huaj, duke shpërdoruar në mënyrë barbare pushtetin. Londra flet me emra.
Në dokumente thuhet se një ish-klient i Argita Berishës, biznesmeni pakistanez Zafar Ansar, dha një ide se si vepronte firma duke publikuar disa emaile në vitin 2009. Ansar, i cili më herët pati qenë konsulli i nderit i Shqipërisë në Pakistan, pati punësuar kompaninë ligjore të Malltezit për të ndërmjetësuar me autoritetet vendore mbi ndërtimin e një termocentrali në Shqipëri me vlerë gati 100 milionë euro. Sipas Ansar, përveç kërkesës për tarifë ligjore prej 200 euro për orë, gjysma e rrogës mesatare mujore në Shqipëri, Malltezi kërkoi një tarifë suksesi prej tre për qind të të gjithë investimit, duke tundur ndikimin e babait të saj si garanci.
Berisha e merr në mbrojtje Argitën
Ish-kryeministri para pak javësh e mori në mbrojtje Argitën nga këto akuza të britanikëve. Sipas tij, Argita ia bëri të qartë z.Ansar, në prezencë të dy dëshmitarëve të tjerë në takim, se firma e saj do të ofronte shërbime ligjore vetëm për procedura të investimeve direkt private, që nuk kishin nevojë për partneritet qeveritar dhe proces tenderimi.
“Në atë takim ai konfirmoi se ai nuk dëshironte të ndiqte procedura partneriteti me qeverinë, por ato të investimit privat. Më vonë ai ndryshoi mendje dhe kërkoi t’a kanalizonte investimin e tij si PPP dhe kërkoi ndihmën e vajzës sime për të shmangur procesin e tenderimit.
Vajza ime e refuzoi këtë kërkese, në prani të dëshmitarëve, si dhe i shpjegoi atij se tenderimi ishte i detyrueshëm për këtë procedure dhe se nëse ai do të zgjidhte këtë formë investimi, ajo nuk do të mund ta përfaqësonte më për shkak të konfliktit të interesit. Kur kërkesa e tij për të shmangur tenderimin, një kriter i detyrueshëm për kontratat publike të këtij lloji, u refuzua nga zyrtarët përkatës të qeverisë, z. Ansar, pa asnjë provë apo fakt, shpifi dhe sajoi arsye të tjera për refuzimin e kërkesës së tij. Ai pretendoi, pa paraqitur asnjë fakt apo dokument, se kërkesa e tij ishte rrëzuar sepse ai nuk pranoi të blinte një ngastër toke të ofruar nga studioja ligjore e vajzës sime”, ishte reagimi i Berishës.
Intervista që fundos familjen Berisha
Edhe pse Berisha përpiqet ta mbrojë me forcë të bijën, biznesmeni pakistanez, Zafar Ansar, në atë kohë ka nxjerrë fakte që kompromentojnë Argitën. Zafar Ansar tregon se si Argita Berisha i kërkon ryshfetin, ndërsa i kishte nisur marrëveshjen e investimit. Ai tha se Argita ia kishte dërguar faturën e ryshfetit pa datë dhe kod taksash, duke treguar se e bija e Berishës nuk paguante taksa për tarifat e saj të gjobave.
Ndërkohë, biznesmeni pakistanez ka hedhur poshtë edhe pretendimet e Berishës se kushtet për investimin nuk mund të plotësoheshin. Biznesmeni pakistanez ka rrëfyer gjithë kalvarin e historisë së tij me Gitën e Berishës, për investimin në një hidrocentral. Rrëfimi i tij është vërtet tronditës dhe për më shumë i rëndë është fakti i uzurpimit të shtetit shqiptar në ato vite nga fëmijët e Berishës, Gita dhe Zeni. Më poshtë denoncimi i plotë i pakistanezit Zafar në vitin 2014:
-A i keni kërkuar Argita Malltezit që në emrin tuaj të ndërmerrte ndonjë veprim konkret, pasi ajo ka deklaruar se ju nuk e keni paguar për punën që ka bërë? Cili është shpjegimi juaj për këtë?
Gjatë takimit i tregova Argitës se do të më duheshin shërbimet e saj ligjore për t’u marrë me të gjitha kërkesat ligjore. Ajo ra dakord dhe më dërgoi tarifat për shërbimet e saj, që siç e dini përfshinte edhe tarifën e suksesit prej 3%. Unë nuk e kam firmosur marrëveshjen. Argita më ka dërguar një faturë për punën e saj në një copë letër, ku nuk ishte shkruar numri i regjistrimit të saj, data, kodi taksave apo TVSH-ja.
Kjo lidhej me punën e saj për periudhën 20 Gusht-30 Shtator. Shuma që më faturohej ishte për 42,5 orë punë pa dhënë asnjë detaj për punën e bërë dhe pa dokumente shoqëruese. I kam kërkuar të më dërgonte të gjitha dokumentet për të vërtetuar punën e bërë. Nuk kam marrë asnjë përgjigje prej saj, prandaj edhe faturën nuk e kam paguar. Mund t’ju vë në dispozicion faturën e dërguar prej saj.
-A keni ndonjë ide se ku ndodhej toka të cilën Argita ju ofroi për ta blerë?
Më ishte treguar se toka ndodhej në Porto Romano të Durrësit. Unë kurrë s’kam qenë në Durrës dhe nuk e di se ku ndodhet.
-Opozita shqiptare thotë se toka që ju ofrua ta blinit është pronë e biznesmenit Damir Fazlliç. A ju tregoi Argita kur e takuat apo në korrespondencën mes postës elektronike, se cili ishte pronari i tokës?
Nuk e di se cili është pronari i tokës dhe nuk më është përmendur asnjë emër.
-Gjatë mbledhjes së grupit parlamentar të PD-së, kryeministri citohet të ketë deklaruar se kërkesat tuaja në bazë të legjislacionit shqiptar, s’mund të realizoheshin pasi keni kërkuar një investim ekskluziv në këtë fushë, naftë pa TVSH dhe tokë private në kuadër të nismës “Shqipëria një Euro”. A i keni drejtuar kryeministrit apo këshilltarëve të tij këto kërkesa?
Kujtesa ime për takimin tonë është krejt ndryshe. Arsyeja përse doja të takoja kryeministrin ishte thjesht për ta informuar rreth propozimit tim që lidhej me ndërtimin e një TEC-i në Shqipëri dhe për të marrë bekimin e tij për ta bërë një gjë të tillë. Kryeministri pati mirësinë të binte dakord dhe më tha të ecja përpara me projektin.
Unë nuk i kam kërkuar kryeministrit asgjë ekskluzive apo tokë falas. Ne në ofertën tonë parashikonim se na duhej 45,000 metra katrorë tokë me vlerë 2,2500,00 euro. Oferta që ne i propozuam KESH nuk përfshinte TVSH-në apo ndonjë taksë tjetër për TEC-in 144 mega. Kjo është një praktikë ndërkombëtare që të mos përfshihen taksat sepse ti nuk mund të parashikosh ndryshimin e taksave në të ardhmen.
-A i keni lexuar komentet e shkruara nga Selami Xhepa, ish-këshilltar i kryeministrit dhe çfarë mund të na thoni për atë që thotë z. Xhepa?
Me keqardhje dua t’ju them se artikulli i shkruar nga ish-këshilltari kryeministrit Berisha, Selami Xhepa, me titull “Historia ime me biznesmenin Ansar”, është i mbushur me një sërë gjërash. E ndërsa kryeministri pretendon se projekti im u bllokua nga kërkesat e mija ekskluzive, ish-këshilltari i tij, z. Xhepa, pretendon se “Politika e qeverisë ishte të dekurajonte TEC-et që do të punonin me naftë dhe kjo ishte arsyeja përse projekti u bllokua”. Cili ka të drejtë?
Kryeministri apo këshilltari? E refuzoi kryeministri ofertën e projektit për çështje ekskluziviteti apo për çështjen e naftës? Në të tilla kushte nuk kishte arsye përse unë të vazhdoja dhe të dërgohesha në zyrën e vajzës së kryeministrit. Kam një tjetër pyetje. Përse KESH-i nuk e refuzoi ofertën? Z. Selami Xhepa thotë se unë vij nga një vend ku përmes pagesave korruptive, blen gjithçka duke hequr çdo pengesë.
Uroj shumë të kisha rënë dakord ndaj kërkesave që m’u bënë dhe kështu nuk do të kisha patur asnjë pengesë. Unë nuk veprova kështu, prandaj edhe projekti nuk gjeti rrugën e zbatimit. Dua t’i them z. Xhepa se unë nuk e njihja se kush ishte vajza e kryeministrit. Atë ma prezantoi ambasadori Admir Banaj, një njeri i besuar i kryeministrit. Argita më ofroi shërbimet e saja dhe unë rashë dakord të bashkëpunoja me të. Ajo më dërgoi marrëveshjen për të siguruar pagesat e saja për shërbimet ligjore, përveç të cilave, kërkonte edhe 3% si tarifë suksesi. Unë nuk e nënshkrova këtë marrëveshje pasi e konsiderova si ryshfet. Projekti im u arkivua jo nga kërkesat ekskluzive, apo çështje të naftës, por sepse nuk pranova kërkesat.
Kompanitë e mija operojnë në shumë vende, përfshirë Suedinë ku etika ligjore është më perfektja në botë. Këshilltari kryeministrit, Selami Xhepa, duke iu referuar origjinës time nga Pakistani thotë se: “me ryshfet unë mund të arrij çdo gjë”. Por z. Xhepa duhet ta dijë se transparenca dhe ryshfeti trajtohen me shumë seriozitet në Pakistan. Në më pak se një vit Gjykata Supreme e Pakistanit shkarkoi kryeministrin në detyrë për faktin se gënjeu drejtësinë.
Ndërsa këtë muaj, kryeministri tjetër në Pakistan u gjet fajtor nga gjykata pas akuzave për korrupsion dhe Gjykata Supreme ka lëshuar një urdhër-arresti ndaj tij. Shpresoj që edhe gjykatat shqiptare do të ndjekin Pakistanin si shembull për të luftuar korrupsionin që vjen nga zyrat e nivelit të lartë. Askush nuk mund të jetë mbi ligjin.
-Z. Ansar, e përshkruat kërkesën e zonjës Berisha për tarifën e suksesit prej 3% si ryshfet. Ju zhvilloni biznesin tuaj në disa vende të botës. A jeni vënë ndonjëherë përballë kësaj lloj kërkese nga kompanitë ligjore që keni bashkëpunuar?
Kur ju shkoni në një kompani ligjore, ato ju faturojnë për shërbimet ligjore që ofrojnë. Por kjo kërkesë ishte diçka e re për mua. Nuk e di se për çfarë ishte ky 3 përqindësh. S’kam asnjë ide. Unë bashkëpunoj me zyra ligjore çdo ditë. Vajza ime punon në një prej kompanive më të mëdha ligjore në botë, e quajtur Little Chance. Ajo më tha se kurrë nuk e kishte dëgjuar diçka të tillë.
-Pas intervistës tuaj të parë në 15 Janar 2013, ka lindur një pyetje: Cili është motivimi juaj të flisni tani për një çështje e cila ka ndodhur në vitin 2007?
Gjatë gjithë kësaj kohe kam dashur mos të përfshihem në politikën e brendshme të Shqipërisë, pasi nuk kam asnjë interes sot dhe as që kam për të patur në të ardhmen. Me keqardhje dua t’ju them se nuk kisha zgjidhje tjetër, por t’i përgjigjesha artikullit shpifës të zotit Xhepa. /Elmas Bogdani