Komisioni i Disiplinës në UEFA-s, ka gjobitur Federatën Shqiptare të Futbollit (FSHF), në total me 44 mijë euro për ndeshjen mes Shqipërisë dhe Polonisë, e cila u zhvillua më 10 shtator në stadiumin “Air Albania” në Tiranë në kuadër të kualifikimeve për “Euro 2024” për grupin E kualifikues, ku kuqezinjtë fituan 2-0.
Federata shqiptare është gjobitur me 30 mijë euro për ndezjen e fishekzjarrëve nga tifozët, hedhjen e sendeve dhe akteve dëmtuese në duelin me Poloninë. Po ashtu, UEFA ka urdhëruar edhe mbylljen e pjesshme të stadiumit (tribunës veriore dhe jugore) për ndeshjen e ardhshme si vendas, por këtë vendim e ka lënë në provë dhe do hyjë në fuqi nëse akte të tilla përsëriten për një periudhë dy vjeçare.
Ndërkohë, me 14 mijë euro tjera, FSHF-ja është gjobitur për bllokimin e rrugëve publike. Krahas gjobave, FSHF-ja ka marrë edhe paralajmërime për sjelljen e pahijshme të ekipit, reklamimin e ndaluar të sponsorëve në çanta, mosrespektimin e kërkesave minimale mjekësore, moszbatimin e një strategjie të duhur të ndarjes së biletave dhe për mediat e paautorizuara në fushë.