Granit Xhaka po tërheq vëmendje jo vetëm për karrierën e tij në futboll, por edhe për një paraqitje të veçantë jashtë fushës së blertë, ku shfaqet në një rol aktorial.
Kapiteni i Zvicrës me origjinë shqiptare është bërë pjesë e një filmi të shkurtër promocional me tematikë ‘western’, ku shfaqet si kauboj përkrah legjendës së kinemasë, Terence Hill.
Projekti titullohet “The Socceritos” dhe është realizuar si një fushatë promovuese nga një kompani zvicerane. Në të marrin pjesë edhe futbollistë të tjerë, të cilët së bashku sjellin një kombinim mes botës së futbollit dhe atmosferës së Perëndimit të Egër.
Sipas konceptit të projektit, personazhet udhëtojnë në një ambient tipik ‘western’, ku përpiqen të “sjellin” futbollin tek banorët vendas. Gjatë rrugëtimit, ata përballen me sfida dhe një kundërshtar që tenton të ndalojë lojën, duke krijuar situata humoristike dhe dinamike.
Xhirimet janë realizuar në Spanjë, zona të njohura për përdorim në filma klasikë të këtij zhanri, çka i jep projektit një pamje autentike kinematografike.
Ky projekt e tregon Xhakën në një anë ndryshe nga ajo e futbollistit, duke u shfaqur si pjesë e një eksperience argëtuese mes sportit dhe kinemasë.