Në hemisferën veriore vera është në kulmin e saj, ndërsa në hemisferën jugore është dimri dhe është normale që të ketë reshje bore atje.
Megjithatë, nuk është e zakonshme që bora të bie në viset ulëta të Brazilit dhe një gjë e tillë jashtëzakonisht e rrallë po ndodh këto ditë. Në jug të Brazilit bora ka “zbritur” deri te viset më të ulëta të vendit dhe kjo nuk ka ndodhur për dekada të tëra në këtë vend të globit.
Një masë e fuqishme e ftohtë ajrore nga Antarktiku ka depërtuar në pjesët qendrore të Kontinentit të Amerikës Jugore duke shkaktuar reshje dhe furtuna shiu e bore, por ajo çfarë i habiti banorët dhe meteorologët është bora në viset më të ulëta në jug të Brazilit.
Një sistem i fuqishëm i presionit të ulët atmosferik bëri të mundur zhvendosjen e masës së fuqishme të ftohtë ajrore nga Antarktiku në drejtim të jugut të Amerikës së Jugut e pastaj në pjesët qendrore të Kontinentit, ndërsa kjo mund të jetë arsyeja e rritjes së temperaturave në Antarktik.