Të dielën një incident tepër i rëndë u regjistrua në kampionatin grek teksa presidenti i PAOK, Ivan Savvidis, u fut në fushën e lojës i armatosur duke kërcënuar arbitrin e ndeshjes.
Si rrjedhojë e këtij veprimi, i cili është i fundit në një seri të gjatë dhune brenda dhe jashtë fushe, qeveria greke mori vendimin për ndërprerjen pa afat të kampionatit.
Sipas të përditshmes sportive “Live Sport” të martën, presidenti i Federatës Helene të Futbolli Vangelis Grammenos, që u emërua në krye të institucionit më të lartë futbollistik në Greqi falë mbështetjes së PAOK, tashmë gjendet në një situatë të rënduar psikologjike, nën presionin e zhvillimeve në Super Ligën e Greqisë, dhe është pranë dorëheqjes.
Burime të tjera pretendojnë se ai nuk do të dorëhiqet tani, por mund ta bëjë më vonë, me të përfunduar disa çështje hetimesh në lidhje me ngjarjet në Super Ligë. Pikërisht gjendja e tij e rënduar është edhe arsyeja e heshtjes nga ana e federatës, për ngjarjet e ndodhura në Stadiumin Toumba.
Dimitris Skouteris, kreu i komitetit të apelit në EPO, që me vendimin e tij i ktheu PAOK tre pikët e zbritura, vuajti disa muaj më parë një sulm në rrugët e Athinës nga disa agresorë të panjohur. Lajmi u zbulua nga kreu i Institutit për Sportet Ndërkombëtare dhe Helenike, Giorgos Panagopoulos, përmes një rrëfimi të hënën në “Skai TV”.
Skouteris kishte informuar Panagopoulos dhe të dërguarin e FIFA’s nga Qipro në Athinë Costakis Koutsokoumnis, në lidhje me sulmin që kishte pësuar në rrugën “Kifissias Avenue”. Skouteris i kishte pranuar Panagopoulos se kishte frikë për jetën e tij dhe iu shmang çështjeve gjyqësore për rreth 6 muaj. Klima e presionit dhe terrorizmit në futbollin grek ka kulmuar me fjalët që arbitri i ndeshjes PAOK-AEK, Giorgos Kominis, raportohet të ketë thënë në dhomat e zhveshjes të Stadiumit Toumba, mbrëmjen e të dielës: “E kam mbyllur me arbitrimin. Kini mëshirë për mua, jam i frikësuar për jetën time, bashkëshortja ime është 7 muaj shtatzënë…”.