Qeveria e kancelarit Friedrich Merz në Gjermani po përballet me një valë të fortë pakënaqësie politike dhe qytetare, ndërsa protestat kundër qeverisë janë përshkallëzuar.
Rreth 10 mijë persona marshuan në Plauen të Saksonisë, duke kërkuar dorëheqjen e qeverisë dhe zhvillimin e zgjedhjeve të parakohshme federale. Protestuesit dolën në rrugë me flamuj gjermanë dhe pankarta ku shkruhej “Merz duhet të ikë”.
Organizatorët prezantuan një listë me 11 kërkesa, mes tyre zgjedhje të parakohshme, ulje të kostove të energjisë elektrike dhe gazit, një biletë kombëtare prej 29 eurosh për transportin publik, reforma në shëndetësi dhe kontrolle më të rrepta mbi emigracionin.
Kritikat u përqendruan gjithashtu te rritja e shpenzimeve ushtarake. Protestuesit argumentuan se fondet për riarmatim po rriten në dëm të shpenzimeve sociale dhe mirëqenies së qytetarëve.
Merz në pikën më të dobët
Pakënaqësia në rrugë vjen në një moment kur edhe sondazhet tregojnë një rënie të fortë të mbështetjes për kancelarin.
Sipas sondazhit ARD-DeutschlandTrend, 84% e gjermanëve shprehen të pakënaqur me punën e kancelarit dhe koalicionit qeverisës. Mbështetja personale për Friedrich Merz ka zbritur në vetëm 13%, niveli më i ulët i regjistruar për një kancelar gjerman që nga nisja e këtij sondazhi në vitin 1997.
Ndërkohë, AfD po forcon pozitat e saj në sondazhet kombëtare dhe veçanërisht në landet lindore të Gjermanisë.
Situata shihet me shqetësim në prag të zgjedhjeve të rëndësishme rajonale në Saksoni-Anhalt dhe Mecklenburg-Pomerania Perëndimore, ku AfD po regjistron mbështetje të lartë.
Nëse trendi vazhdon, zgjedhjet rajonale mund të sjellin një tjetër goditje për partitë tradicionale dhe të forcojnë ndjeshëm pozitat e së djathtës ekstreme në politikën gjermane.