Kanë nisur provat në linjën hekurudhore Tiranë-Rinas-Vorë-Durrës. Lajmi është bërë i ditur nga deputeti Taulant Balla, i cili ka publikuar në rrjetet sociale pamje nga procesi i testimit të kësaj linje.
Në pamjet e publikuara shfaqet treni në stacion, ndërsa disa punonjës të cilët ndodhen në peron gjatë zhvillimit të provave.
Linja do të shërbejë për lidhjen hekurudhore mes Tiranës, aeroportit të Rinasit, Vorës dhe Durrësit, duke përfshirë disa prej pikave kryesore të transportit në këtë aks.
“Fillojnë provat në Linjën Hekurudhore Tiranë-Rinas-Vorë-Durrës”-shkruan Balla.
Treni i ri në linjën Tiranë–Durrës (dhe degëzimin drejt Rinasit) është projektuar për të qenë elektrik, por aktualisht po testohet me tren me naftë.
Pse po përdoret nafta tani: Elektrifikimi i linjës nuk ka përfunduar ende, ndaj testimi i parë mbi shina është bërë me tren me naftë.
Sipas raportimeve të Zoom.al, hekurudha u testua me naftë ndërsa pritet instalimi i sistemit të furnizimit me energji elektrike.
Kur bëhet elektrik: Ministri i Infrastrukturës dhe Energjisë, Enea Karakaçi, ka bërë të ditur se punimet në shina kanë kaluar 90% dhe se elektrifikimi pritet të zgjasë rreth 12 muaj pas miratimit nga BERZH dhe lidhjes së kontratës, me synim përfundimin brenda vitit 2027, siç raporton edhe ABC News Albania.

