Hapja e negociatave të Shqipërisë me Bashkimin Evropian është në dorë të Emmanuel Macron, presidentit të Francës. Kjo deklaratë ka ardhur nga agjencia ndërkombëtare e lajmeve “Reuters”, referuar dhe draftit paraprak të publikuar, ku jep dritë jeshile për Shqipërinë. Por, sipas agjencisë, një diplomat i BE ka deklaruar se hapja e negociatave të Shqipërisë me Bashkimin Evropian këtë muaj, është në dorë të Francës.
“Reuters” shton se të tjerë mendojnë se Parisi mund të shtojë kushte të tjera përveç 9 kushteve gjermane, si një kompromis për të dhënë dritën jeshile. Duke iu referuar draftit paraprak të deklaratës, që pritet të miratohet nga ministrat e Bashkimit Evropian, në takimin e 15 tetorit, Gabriela Baczynska, shkruan për “Reuters” se nuk ka datë për konferencën e parë ndërqeveritare me Shqipërinë. “Duke lënë pjesën për Maqedoninë e Veriut të pandryshuar (hapje negociatash), (drafti i deklaratës së ministrave të BE) nuk jep datë për konferencën e parë ndërqeveritare me Shqipërinë, por propozon një listë me shumë reforma që Tirana duhet të realizojë përpara se ky takim të realizohet”, raporton Reuters. Në artikull, theksohet se nëse ministrat e BE-së nuk arrijnë një marrëveshje, kancelarja gjermane, Angela Merkel mund të kërkojë ndihmë nga Macron, për të arritur kompromisin. Ndryshe nga Shqipëria, Maqedonia e Veriut po mirëpritet nga shtetet e BE-së, të cilat janë të gatshme të hapin negociatat dhe takimi i parë ndërqeveritar pritet të zhvillohet në fund të këtij viti.
Macron një vit më parë bllokoi hapjen e negociatave me Shqipërinë, ndërsa këtë vit, presidenti i Francës ka heshtur, duke mos dhënë asnjë përgjigje. Pritet që Franca, ndryshe nga Gjermania, mund t’i kërkojë Shqipërisë të bëjë më shumë për të frenuar radhët e gjata të emigrantëve, referuar edhe shqetësimit të Macronit, në Asamblenë e Këshillit të Evropës në Salsburg, disa ditë më parë, për numrin e azilkërkuesve nga Shqipëria. Kundër integrimit të Shqipërisë në Bashkimin Evropian, vazhdon të mbetet edhe Holanda, e cila e ka shprehur hapur qëndrimin e saj. Por jo vetëm, Danimarka gjithashtu është skeptike.