Grushtet dhe shkelmat që pasuan sfidën Tirana-Laçi fundjavën e shkuar në kampionat, duket se e kanë ftohur tej mase raportin midis dy ekipeve që nuk janë shquar për “hasmëri” mes tyre.
Ditën e sotme, në Kurbin kryeqytetasit u mundën me rezultatin 2-0 por ia dolën të kualifikohen në gjysmëfinale të Kupës së Shqipërisë pas fitore 3-0 në sfidën e parë në shtëpi.
Por, pas ndeshjes ka pasur sërish tension. Kështu, mësohet se Presidenti i Laçit, Pashk Laska është shoqëruar në polici pasi është konfrontuar fizikisht me Presidentin e Tiranës, Refik Halili.
Laska, që ishte protagonist edhe në sherrin me sulmuesin e Tiranës, Majkëll Ngo, duket se nuk e ka kapërdirë dot eliminimin nga Kupa e Shqipërisë dhe ka shkarkuar nervat te Halili.
Madje mësohet se incidenti ka qenë tepër i rëndë, pasi Lasak e ka ndjekur me automjetin e tij tip “BMW” deri në hyrje të Tiranës, Refik Halilin. Sherri mes tyre ka ndodhur te zona e doganës në kryeqytet.
“Procesi Sportiv” raporton në Facebook, se Halili e ka denoncuar në komisariatin Nr.6 të policisë Laskën për goditje, dhe më pas presidenti kurbinas është shoqëruar në ambientet e komisariatit. Bashkë me Laskën janë shoqëruar edhe dy persona të tjerë.
Njoftimi i Policisë:
Shërbimet e Policisë të Komisariatit Nr.6, proceduan penalisht në gjëndje të lirë shtetasit R. H., dhe P. L.
Procedimi ndaj këtyre shtetasve filloi pasi, në zonën e ish-doganës së vjetër, pranë sheshit “Shqiponja” janë konfliktuar fizikisht me njëri-tjetrin.
Materialet i kaluan për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprën penale “Dëmtime të tjera me dashje”, parashikuar nga neni 90 i Kodit Penal.