Nga Anri Bala
Sot, si çdo ditë, kroi i fshatit, ku nuk mbushet ujë, por shurrojnë dhe lehin qentë… në Shqipëri, gurgulloi me një histori të re, nga ato shumë të vjetrat, që e hudh njëri fjalën e pret tjetri, e historia bëhet litar dhe tel me gjemba i mpleksur, e çdokush mundohet ta mpleks më tepër, që nga “bejtexhiu” i parë, që e ka marrë detyrë bejten, e deri tek i “varfëri i papunë”, që gdhihet e ngryset në kafene, me iPhone në dorë. Jo për ndonjë gjë, po përderisa nuk ka ç’të haj, të paktën të ushqej mendjen, me gjithë farë marrëzirash, që i gjen falas te “Përroi i qenve”.
Tani jam i bindur, se ky i shkretë vend, është kthyer në një lum të ndotur, ku buron shpifja e papërmbajtshme! Si mos të të mbushet mendja, kur kam vite që dëgjoj, se Berisha është “vrasës, hajdut, kriminel” dhe dhjetra akuza të tjera, nga kundërshtarët?! Por, a nuk janë shpifje, kur ai që i thotë, nuk ia vërteton kurrë, por bashkëjeton me të zezat e tij dhe i harron pa pikë pendese.
Si të mos më mbushet mendja, kur shikoj çdo ditë Lulin, “hajdutin, vrasësin, grabitësin, qafirin dhe spiunin”, që cicëron si zog, ulëret si luan dhe është aty, i paguar mirë nga ne, si pjesë e përroit dhe as që e merr mundimin, tu përgjigjet lehjeve të palës tjetër. Ai e di mirë, se edhe lehjeve të tij nuk u përgjigjet njeri, ndaj leh pas gardhit, i lidhur në zinxhirë, që të mos e hajë ujku!
Edhe këto që thashë janë shpifje pa fund, përderisa askush nuk bind, se janë të vërteta.
Po pse, vërtetë mund ta besoj, se Iliri me “flori, babëzi, bllok dhe hajdutëri, i poshtër, i pangopur”… dhe në fund mbret, nuk është viktimë e shpifjes?! Kjo është shpifje e ndyrë, kur ata që folën vetëm flasin, për të mos ngrënë veten e tyre me dhëmbë… nga “smira”.
Për Ramën me “200 milion dollar, e Olsin drogaxhi, babain vrasës, piktor dhe ekzekutor”, kur ekzekutorët dhe vrasësit e diktaturës, kanë mbushur gjykatat e Shqipërisë dhe ekzekutojnë edhe sot, por me para… unë i besoj shpifjes!
Shpifje?! Jooo… e vërtetë, kur askush nuk dënohet si shpifësi, sepse morali i uzurpatorëve të “Përroit të Lehjes”, i lejon “akuzat shpifje” politikisht.
Kurse sot, plasi përgjimi, çimkat, mesazhi dhe grupazhi, për një qytetar, që nuk ka lidhje me politikën, dënuar, por si të lidhur me luftën e klasave, duhet të internohet i vëllai, qafir që nuk e dërgoi me duart e veta atje në qeli… sepse ky është morali i sistemit “llumi”!
Këto shpifje dhe lehje nga të dyja palët, janë për t’i lodhur e munduar të palodhurit e FB, që as gjumi nuk do ti zërë, deri kur ta marrin vesh të vërtetën… asnjëherë!
Po, po asnjëherë, se të dyja palët gënjejnë, shpifin, mashtrojnë, sepse “Përroi” për këtë punë është, e ka vend për të gjithë. Nëse do ishte ndryshe, i akuzuari duhet të paraqitej me këmbët e tij, atje ku zgjidhet e vërteta dhe shpifësi do shkonte vet, atje ku i jepet drejtësi shpifjes.
Këtu, shpifësi nuk ka as turp e as frikë, sepse ka frikë vetë e vërteta. I shkruaj këto rrjeshta, sepse mu kujtua kur dëgjova fjalët “shpifës, shpifje, shpifarak, i shpifur” në çdo ekran që hapja, se nesër edhe unë kam gjyq, si “shpifës” me fakte e prova, me një person që më akuzon për shpifje, një hajdut i lindur nga hajdutëria politike, i dënuar me vendim të formës së prerë dhe i dyshuar, se nuk e ka lënë zanatin, por e ka rritur thesin! Nuk bëra asgjë, thashë një të vërtet, se Besjani pa peshë, peshon më shumë me hajdutëri!
Por, këtu nuk mund të thuash të vërtetën. Këtu duhet të shpifësh, si psh… mund të thoja se Besiani pa peshë, nuk ka OJQ “Nisma Thurje”, por “LGBTI”, ose është imoral. Jam i sigurt, se asnjë gjykatë nuk do ta pranonte padinë e hajdutit, sepse këtu nuk ka gjyqtarë për shpifje, por … për mos thënien e së vërtetës.
Megjithatë, fajin e kam vetë, që nuk kam zënë mend, sepse në “Përroin e Qenëve”, lehja nuk është qenëri, por moral dhe burrëri, sepse që të lehësh pas gjithëkujt, duhet të jesh trim!
Fjala shpifje dhe thashetheme, tashmë ka ndryshuar kuptim, sepse nëse do guxonte një burrë, dikur në kohën e burrave, të shpifte ose gënjente, atij do i pritej gjuha… nga Kuvendi i Burrave.
Kurse kjo që kemi patur e kemi akoma përpara, ku burrat nuk ekzistojnë, quhet Kuvendi i Prostitutave, që nuk të pret asgjë, vetëm se të bën me dy…!/Ekskluzive.al