Ejani të gjithë në shtëpi… këtë herë askush nuk shpëton”: ishte një larje hesapesh e paramenduar ajo që grupi i trafikantëve të drogës, i udhëhequr nga 40-vjeçari shqiptar Igli Kamberi, vuri në zbatim kundër Francesco Diviestit, berberit 26-vjeçar nga Barletta, i zhdukur më 25 prill 2025 dhe i gjetur i vdekur katër ditë më vonë. Diviesti kishte lidhje me këtë grup përmes një shoku që e kishte futur në botën e shpërndarjes së vogël të drogës: “Ai kishte një rreth njohjesh që nuk më pëlqente”, tha nëna e tij Maria Marzocca, “kemi debatuar për këtë”. Dhe pasi djali i saj u vra, ajo shkoi t’ua tregonte hetuesve: “Kishim frikë, sepse këta janë njerëz të rrezikshëm, por nuk mund të ndalesha, më kanë shqyer lëkurën dhe zemrën”.
Pak ishin ata që ndihmuan, ndërsa shumë të tjerë heshtën, si Sabino Corvasce dhe Sofia Cafagna, të cilët përfunduan në burg dhe në arrest shtëpie për favorizim. Për prokurorët Daniela Chimienti, Ettore Cardinali dhe Vito Valerio, autorët e vrasjes janë Kamberi, Nicola Di Benedetto dhe Antonio Lanotte, të cilët e morën me forcë nga Barletta dhe e transportuan në një gurore mes Minervino dhe Canosa, ku e vranë me pesë plumba të qëlluar nga dy pistoleta. Më pas trupi u dogj, “si fyerje ndaj kujtimit të tij”, theksoi koordinatori i DDA-së, Giuseppe Gatti (që drejtoi prokurorët pas Francesco Giannella), “dhe si paralajmërim për komunitetin”.
Krimi lindi nga një borxh prej 500 eurosh për një sasi droge, që Diviesti kishte marrë nga grupi dhe më pas kishte menduar ta shlyente duke i ofruar Kamberit një makinë me qira. Pas kthimit të automjetit, 26-vjeçari ende i detyrohej 300 euro. Por ai kishte ngritur pretendime për kilometrazhin e bërë dhe kishte shpjeguar se nuk do të jepte para të tjera. Shqiptari e kishte marrë këtë si një fyerje të pafalshme.
E kishte arritur në një plazh dhe e kishte mbajtur me kokën nën ujë për t’i dhënë një mësim. Më pas, nën përgjim, komentonte: “Po e mbysja”. Dhe shtonte: “Çfarë kontrate, kjo është çështje familjeje”, duke nënkuptuar se Diviesti nuk mund të fyente një shef të nivelit të tij duke diskutuar për kilometrat e përshkuar me makinën me qira. Për këtë arsye u vendos vdekja e tij, e paramenduar sipas gjyqtarit Giuseppe De Salvatore, dhe e ekzekutuar me metoda mafioze.
I riu u detyrua të gjunjëzohej dhe, pas plumbave të parë, iu qëllua edhe në fytyrë. Mizoria e ekzekutimit duhej të shërbente si paralajmërim për ata që mbeteshin gjallë, përfshirë mikun e Diviestit, i cili ishte rrahur brutalisht në një bar dhe që duhej të vdiste bashkë me të. Sipas hetimeve të DIA-s dhe policisë së Andrias (të drejtuara nga koloneli Giulio Leo dhe questore Alfredo Fabbrocini), ai shpëtoi vetëm sepse më 25 prill ishte arrestuar për posedim arme.
Konteksti i rindërtuar ishte ndër më të rrezikshmit, dhe ndoshta as vetë parukieri nuk e kishte kuptuar përmasën e tij. “Kemi dëgjuar të flitet për mafien shqiptare, për trafik droge, por ç’lidhje kishte djali im me këto ambiente?”, tha nëna e viktimës. Ai, me shumë gjasa, nuk e dinte vërtet me kë kishte të bënte. As që mafia shqiptare është zhvendosur në Puglia me gjithë egërsinë që buron nga kode nderi të lashta dhe të pamëshirshme, në transformimin kriminal të Kanunit. Kamberi në Barletta kishte ngritur një grup të qëndrueshëm dhe dominues në trafikun e lëndëve narkotike, fitimet milionëshe të të cilit më pas dërgoheshin në Shqipëri për t’u pastruar. Në dy operacione të DIA-s janë sekuestruar 680 mijë dhe 400 mijë euro.
Së bashku me pesë arrestimet në Barletta, janë ekzekutuar edhe dhjetë masa sigurie në Shqipëri, në kuadër të një hetimi tjetër të koordinuar nga Prokuroria e Posaçme e Tiranës. Me të cilën DDA e Barit vazhdon të bashkëpunojë, me nxitjen e prokurorit Roberto Rossi./La Repubblica