Lionel Messi është padyshim një nga futbollistët më të mirë në historinë e futbollit. Lojtari i PSG-së arriti të bëhet idhull edhe në Argjentinë. Shihet nga shumë njerëz si pasardhësi i Diego Maradonës, por shpesh i kritikuar pas çdo ndeshjeje të keqe me fanellën e kombëtares.
Megjithatë, gjërat u përmirësuan ndjeshëm me fitimin e Kupës së Amerikës, por tifozët anembanë Argjentinës besojnë se “Zoti i Futbollit” do ta çojë vendin në fronin botëror në Katar. Pablo Giralt është një gazetar i Directv Sports i cili intervistoi Leo Messin, aty ku kishte një moment emocionues. Gjatë diskutimit, gazetari ishte aq entuziast nga intervista me argjentinasin, sa filloi të qante.
“E vetmja gjë që dua për ty është të jesh i lumtur, të bësh mirë në jetë, e meriton. Të admiroj shumë, jam një fans, kam ëndërruar gjithë jetën që mund ta bëj këtë intervistë, por nuk e kam menduar kurrë se do të kisha fatin të isha me ju, të mund t’ju ndjek me komentet e mia. Faleminderit nga zemra”, thotë Giralt dhe më pas vjen reagimi i Messit që i ka gëzuar të gjithë.
“Faleminderit, më emocionon që flas me njerëz të tillë. E di që ka shumë njerëz në Argjentinë dhe në përgjithësi në botë që më kanë ndjekur gjithmonë, më kanë admiruar, si në futboll ashtu edhe për shkak të atij që jam si person. Unë jam mirënjohës për gjithë dashurinë që kam marrë gjatë karrierës sime”, u shpreh Mesi. /Sport Ekspres/