Rindizet beteja për dosjen “Hajdari”. Shpresat ishin që gjatë gjyqit të Izet Haxhisë të dilnin në skenë detaje të reja, por procesi gjyqësor po has vështirësi të mëdha. Këtë të premte do të thirren dëshmitarët e parë, por për avokatin Idajet Beqiri nuk ka kuptim nëse nuk thirret si dëshmitar ish-kryeministri Sali Berisha.
“Gjyqi i Izet Haxhisë është futur në kolapsin e një hendeku të madh dhe të pakapërcyeshëm që është krijuar midis trupit gjykues që kryesohet nga gjyqtari Lazër Sallaku dhe Izet Haxhisë, si personi që po rigjykohet. Ndodhemi përpara një konflikti të rëndë dhe një pabesueshmërie të rëndë.
Izet Haxhia ka prova, fakte dhe ngjarje konkrete të ndodhura në seancat gjyqësore, ku në mënyrë të hapur ka dalë anshmëria ekstreme e trupës gjykuese, të qenurit e saj si “roje besnike” për të mos zbuluar të vërtetën e vrasjes së Azem Hajdarit, si dhe për të mos prekur Sali Berishën, si një ndër bashkëpunëtorët e vrasjes së Azem Hajdarit”, tha avokat Beqiri.
Sipas tij, nuk është parë dhe nuk është dëgjuar kurrë, në asnjë proces tjetër gjyqësor penal, në Shqipëri apo në të gjitha vendet e Europës, ku gjykata nuk i pranon organit të akuzës së shtetit dëshmitarët me anën e të cilëve ky organ kërkon të provojë akuzën e ngritur kundër të pandehurit.
Gjykata nuk pranoi kërkesën e Prokurorit për të thirrur si dëshmitarë të akuzës Sali Berishën, Ylli Rakipin, Vili Minarollin, Genc Pollon etj. “Izet Haxhisë ju mohua marrja e provave me dëshmitarë, pyetja dhe deponimet e të cilëve vërtetojnë pafajësinë e tyre.
Të vërtetën e vrasjes së Azem Hajdarit e vërtetojnë kryesisht 5 dëshmitarë: Sali Berisha, i cili e nxori deputetin në prit, Zenel Neza që mbeti i plagosur në vendngjarje dhe u arratis me këmbënguljen dhe ndihmën e Sali Berishës, Jaho Mulosmani, Bujar Daja, Muharrem Haklaj, Zylfije dhe Aishe Haklaj. Këta dëshmitarë trupi gjykues nuk ka asnjë predispozicion t’i thërres dhe t’i pyes me cilësinë e dëshmitarit”, tha avokati.
28 shkelje ligjore
Sipas avokat Beqirit, trupa gjykuese ka kryer 28 shkelje ligjore. Sipas tij, Izet Haxhia ka paditur dy prej anëtarëve ndërsa për kryetarin ka kërkuar përjashtimin nga trupa. Në kushtet kur ky trup gjykues ka kryer deri tani 28 shkelje të rënda të ligjit procedurial penal, Izet Haxhia u detyrua të padisë në Gjykatën Civile të Tiranës dy prej anëtarëve të trupit gjykues dhe ka kërkuar ndaj tyre një dëmshpërblim për dhimbjet e rënda që i kanë shkaktuar me paligjshmërinë e veprimeve të tyre.
Edhe pse në kushte të konfliktit të rëndë të interesit, edhe pse Lazër Sallaku është i paditur në gjyqin që Izet Haxhia është paditës dhe i kërkon gjykatës detyrimin e tij për dëmshpërblim, përsëri ky kryetar i trupit gjykues nuk jep dorëheqjen për shkak të misionit që ka marrë përsipër, mos zbulimin e të vërtetës së vrasjes së Azem Hajdarit si dhe shmangien nga përgjegjësia të personit kyç që sajoi ngjarjen, që nxori në prit, duke bërë rolin e “hieksit”, të Azem Hajdarin dhe që ishte i vetmi që përfitoi nga kjo vrasje politike.
Në kushtet e mësipërme Izet Haxhia ka depozituar në datën 25 nëntor 2020 një kërkesë për përjashtimin nga gjykimi të gjyqtarit Lazër Sallaku, gjykim të cilin do e ndjek deri në Gjykatën e Strasburgut”, vijon avokati. Duhet theksuar se ditët e fundit Berisha ka dërguar disa mesazhe drejt gjykatës për t’ia bërë të qartë se ai s’ka lidhje me procesin dhe duhet të qëndrojë larg.