Deputeti i Partisë Socialiste, Adnor Shameti komentoi ditën e djeshme zhvillimet në Këshillin Politik, për ndryshimet në Kodin Zgjedhor dhe përfundimin e plotë të ndërhyrjeve në të.
Gjatë një interviste televizive, ai u shpreh se opozita duhet të paraqesë sa më parë një draft final, në mënyrë që sipas tij të kalojë për votim një produkt përfundimtar për t’u hapur rrugën zgjedhjeve të lira dhe të ndershme. Sipas Shametit, PD-LSI janë ftuar për të paraqitur një draft të vetin apo të korrigjojnë dhe të japin mendimet e tyre në draftin që ka paraqitur mazhoranca.
“Është fakt pozitiv që është mbledhur Këshilli Politik, qëllimi ynë si mazhorancë është një orë e më parë të ketë një dakordësi në Këshillin Politik për variantin përfundimtar për teknalitetet që kanë mbetur pa u azhurnuar në lidhje me Kodin Zgjedhor.
I nxis pjesëmarrësit që të kemi një produkt përfundimtar që të kalojë në Kuvendin e Shqipërisë dhe t’i hapet rruga një procesi zgjedhor normal për shqiptarët.
Partia Socialiste ka paraqitur një draft të sajin, kemi ftuar edhe përfaqësues të opozitës jashtëparlamentare që të japin variantin e tyre apo korrigjime për draftin e PS, jam besimplotë që palët do të tregojnë përgjegjshmërinë për të arritur produkt sa më të mirë, në të kundërt të jeni të sigurtë që ne nuk e lëmë Shqipërinë pa e kompletuar legjislacionin zgjedhor si dhe 7 ligjet organike që kanë lidhje me të”, u shpreh Shameti.
në lidhje me pretendimet e opozitës se me variantin e PS listat në të vërtetë mbeten të mbyllura dhe vullnet i kryetarit, Shameti u shpreh se marrëveshja e 5 qershorit dhe miratimi i ndryshimeve kushtetuese në 30 korrik kanë qenë për lista të hapura.
“Ndryshimet në bllok përmes miratimit të paketës së 5 qershorit si dhe miratimi i ndryshimeve kushtetuese në datën 30 korrik nuk lënë më asnjë dyshim se listat do të jenë të hapura, është një arritje historike për votuesit shqiptarë”, tha ai.
Por i pyetur nëse pragu 3 për qind i vendosur në këtë draft i dëmton partitë e vogla, deputeti socialist u shpreh se ky është një propozim i vet 28 deputetëve të opozitës parlamentare.
“Ky propozim origjinal nuk është i PS nëse kthehemi mbrapsht tek gjuha që ka pasur propozimi i 28 deputetëve të opozitës parlamentare për ndryshimet kushtetuese ky 3 përqindësh është ai që parashikohej në atë propozim. Në diskutimin që është bërë në Komisionin e Ligjeve në analizën që është bërë është diskutuar që sa kohë Shqipëria ka një sistem proporcional rajonal më i drejti është pragu natyral i marrjes së mandatit”, tha Shameti.