Aktori Bujar Asqeriu thotë se rotacioni politik është i nevojshëm dhe jetik për vendin. Në një intervistë për emisionin “Kjo Javë” në Neës24, Asqeriu sqaron se nuk ka asgjë të keqe ndryshimi i pushtetit, pasi sipas tij edhe nëse e merr kundërshtari, ai shqiptar është.
Teksa kritikon politiken për konfliktet, Asqeriu thote se Vaso Pasha do te thoshte:” Po jena vllazën or të mjerë”
“Mendimi im është ky, rrotacioni politik i bën shëndet dhe është jetik për fatet e vendit. Ne e kemi shikimin euroatlantik, perse Amerika dy mandate e mban presidentin, pastaj largohet. Sepse pastaj pushtet bëhet për vetëveten, ti dashurohesh kaq shumë me pushtetin sikur të ishin të dashur.
Të ndenjurat ke të tuat, karrigia është e shtetit. Po të kuptohet kjo edhe me modestitë, kushdo që ulet në atë karrige, të thotë populli im i dashur unë kaq fuqi pata, kaq mendje pata, mbase nuk i bëra të gjitha, por do vijë ky kolegu im, shqiptari im.
Po është shqiptar o zotëri, se po u zumë ne, po bëmë gër-vër atëherë Vaso Pasha duhet të ngrihet nga varri dhe të thotë: “Po jena vllazën or të mjerë”. Do ulërinte nga varri Vaso Pasha. Se këtë bëjnë këta, ngrenë edhe Vaso Pashën nga varri. Prandaj shqiptari do të marrë” u shpreh Asqeriu.
Aktori kishte edhe një vlerësim për kreun e opozitës, Lulzim Basha:
“Unë shikoj tek Basha, më pëlqen qetësia. Basha është i qetë. Mund të nxehet, por e kalon në brendësinë e tij. Artikulon bukur, më duket i sinqertë”.
Ai ka paralajmëruar kryeministrin Edi Rama që të mos prekë votat.
“Ai mbase do të rrijë dhe 200 vjet le të rrijë. Po e la sovrani, është në dorën e sovranit jo në dorën time. Por, t’i kujtoj votuesve që të gjithë neve, pavarësisht ideve, mendimeve kemi një gjë në dorë që e kemi të njëllojtë, kemi votën. Zotëri mendohu mirë atje, tek vota.
Do ta paralajmëroja, mos ushtro presion ndaj votës, mos bëj shantazh ndaj votës, mos e bli votën dhe në rastin më të fundit mos i vidh votat sepse pastaj të them ke bërë grusht shteti zotëri. E ke marrë shtetin pa dëshirën e popullit.
Kush ta dha mandatin, e ke vjedhur, nuk është pushteti jot. Vota duhet të numërohet kokërr më kokërr. Ndaj i bëj thirrje elektoratit ta ketë mendjen në kokë”, tha Asqeriu, që së fundmi është shfaqur në fushatën e Bujar Leskajt në Vlorë.