Pas reagimeve që pati në rrjet për deklaratat e Lulit që opozita “do ta bëjë ditën natë”, Bilushi i Metës doli me një deklaratë për publikun, mbi kuptimin e kësaj batute:
“Të dashur miq!
Deklarata e Lulit nuk është gafë, por një fjali e mirëmenduar e tij.
Duke qenë se gjëja më e suksesshme në karrierën e tij është gjumi, natyrisht dhe premtimi i tij kryesor, lidhet me gjumin.
“Të bësh ditën natë”, do të thotë t’i japësh mundësi vetes dhe të tjerëve të flenë më shumë.
Si arrihet kjo?
Luli ende nuk i ka treguar metodat e tij.
Ne si LSI kemi disa idetë tonat.
Fjala vjen, nëse i mban grilat ulur, ke perde të rënda dhe e ke shtëpinë të izoluar mirë, mund ta bësh kollaj ditën natë.
Dhoma errësohet, mbretëron qetësia dhe ti mund të flesh sa të duash.
Ndërkohë ne kemi besim se Luli ka siguruar dhe metoda të tjera, të cilat me siguri do t’i bëjë të njohura.
Nga pikëpamja politike, “të bësh ditën natë”, do të thotë të jesh opozitar i fortë.
Kjo nënkupton që ti duhet të nxish realitetin, ta bësh sterrë atë që qeveris, që atij t’i duket dita, natë.
Ky është kuptimi politik i shprehjes që Luli e ka dhënë në mesazhin e tij.
Shumë vetë e kanë kapur menjeherë këtë mesazh dhe kanë filluar sulmin.
Fjala vjen, ka pasur shumë komente që kanë fyer doktoreshë Najada Çomon dhe kanë ngritur në qiell aftësinë e doktor Flamur Nokës.
Kjo është ta bësh ditën natë.
Kuptimi i tretë i kësaj batute të Lulit, lidhet me natën e listave.
Ajo është një natë e dhimbshme për Lulin, pasi duhet të ndajë pazarin për 140 deputetë, duke i verifikuar me listën e detyrimeve tek kunati.
Një ditë para është tmerr.
Dhe ai uron që ajo ditë të bëhet natë dhe të shpëtojë nga ankthi.
Ka dhe kuptime të të tjera, por besoj se tre mjaftojnë”.