Kryeministri Edi Rama ka folur mbrëmjen e sotme në lidhje me marrëveshjen e dështuar me Lulzim Bashën në vitin 2017, ku u shpreh se ajo marrëveshje dështoi pasi kryedemokrati ra pre e tundimit dhe ndoqi rrugën më të lehtë, atë të konfrontimit, duke treguar se nuk ishte një lider i vërtetë.
“Nuk kishim marrëveshje për bashkëqeverisje, por për bashkëpunim. Lulzim Basha ra pre e tundimit për të marrë rrugën më të thjeshtë, rrugën e konfrontimit duke treguar se nuk ishte një lider i fortë.
Një lider i fortë nuk është ai që krijon debat por ai që të udhëheq dhe fatkeqësisht kjo gjë nuk ka ndodhur në Partinë Demokratike. Bashkëpunimi që ramë dakort ishte edhe e shkruar.
Se si opozita dhe qeveria të punonin bashkë pa u cënuar. Ajo që kërkova unë ishte që së pari çështjet e brendshme të zgjidhen mes nesh dhe të mos zgjidhen në anglisht por shqip. Dhe për problemet e rëndësishme të komunikojmë”, tha Rama.
Kryeministri foli edhe për presidentin Meta, të cilin e akuzoi si krijuesin e mekanizmit të shit-blerjes së votës.
“Ilir Meta duhet të largohet, duhet të dëgjojë të bijën që i thotë “babi mos pi më”. Në aspektin personal nuk kam asgjë me Ilir Metën, unë mendoj se e ndihmoj.
Unë do ta ndihmoj Ilir Metën duke e kundërvotuar që ta çoj në shtëpi. I vetmi që nuk duhet të flasë për shit-blerjen e votës është Ilir Meta.
Këtë mekanizëm e ka krijuar Ilir Meta dhe është përdorur masivisht nga LSI”, tha Rama në Euronews Albania.